ក្រសួងសុខាភិបាលកម្ពុជានាព្រឹកថ្ងៃទី ៥ វិច្ឆិកានេះបានបញ្ជាក់ថា គិតត្រឹមយប់ថ្ងៃម្សិលមិញ ក្រសួងបានរកឃើញ អ្នកដែលបានប៉ះពាល់ជាមួយរដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រីចំនួន ៦២៨នាក់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រសួងបានបន្តទៀតថា លទ្ធផលធ្វើតេស្តអ្នកទាំង ៦២៨នាក់ខាងលើ គឺអវិជ្ជមានវីរុសកូវីដ-១៩ ទាំងអស់។
ជាការកត់សម្គាល់ ការធ្វើតេស្តនេះត្រូវបានធ្វើឡើង ក្រោយពីក្រសួងសុខាភិបាលទទួលបានព័ត៌មានស្តីពីករណីវិជ្ជមានវីរុសកូវីដ-១៩ របស់រដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី ក្នុងពេលដែលលោកកំពុងបំពេញបេសកកម្មផ្លូវការនៅប្រទេសថៃកាលពីថ្ងៃទី ០៤ វិច្ឆិកា ខណៈទើបតែបញ្ចប់ដំណើរទស្សនកិច្ចនៅកម្ពុជាមុននេះមួយថ្ងៃ។
ជាមួយគ្នានោះ ក្រសួងសុខាភិបាលកម្ពុជាបានធ្វើការស្រាវជ្រាវភ្លាមៗដើម្បីរកអ្នកដែលបានប៉ះពាល់ជាមួយលោក ក្នុងរយៈពេល ដែលបានធ្វើទស្សនកិច្ចផ្លូវការនៅកម្ពុជាកាលពីថ្ងៃទី ០៣ ខែវិច្ឆិកាឆ្នាំ ២០២០ កន្លងទៅនេះ។
សូមបញ្ជាក់ថា ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃ ០៤ វិច្ឆិកានេះ បានចេញសេចក្តីប្រកាសព័ត៌មានមួយភ្លាមៗ ក្រោយទទួលបានព័ត៌មាននៃលទ្ធផលធ្វើតេស្តកូវីដ១៩ របស់លោក Peter Szijjarto រដ្ឋមន្ត្រីការបរទេសហុងគ្រី។ លោក Peter Szijjarto ដែលទើបតែបញ្ចប់ដំណើរទស្សនកិច្ចនៅកម្ពុជាថ្មីៗនេះ ត្រូវបានរកឃើញថា មានផ្ទុក COVID-19 ក្នុងអំឡុងពេលដាក់ចត្តាឡីស័កពេលទៅដល់ប្រទេសថៃ។
ក្រោយទទួលបានព័ត៌មាន រាជរដ្ឋាភិបាលកម្ពុជាបានសម្រេចឲ្យថ្នាក់ដឹកនាំ និងមន្ត្រីទាំងអស់ដែលជួបទំនាក់ទំនងជាមួយប្រតិភូ ត្រូវដាក់ឲ្យនៅដាច់ដោយឡែក (ចត្តាឡីស័ក) តាមការកំណត់របស់ក្រសួងសុខាភិបាល៕