មិនធ្លាប់ជួប! រកឃើញភពគ្មានគន្លងគោចរដ៏តូចបំផុត នៅក្នុងកាឡាក់ស៊ីមីលគីវ៉េ

ឈីលី៖ តារាវិទូបានរកឃើញភពឯករាជ្យ(គ្មានគន្លងគោចរ)ដ៏តូចជាងគេ នៅក្នុងកាឡាក់ស៊ីមីលគីវ៉េរបស់យើង ហើយទំហំរបស់វាស្ថិតនៅចន្លោះភពអង្គារនិងផែនដី។ ភពគ្មានគន្លងគោចរគឺជាអង្គធ្វើដំណើរដោយសេរី ដោយមិនវិលជុំវិញផ្កាយមួយ។ ភពនេះត្រូវបានគេដាក់ឈ្មោះថា OGLE-2016-BLG-1928 ត្រូវបានរកឃើញដោយក្រុមតារាវិទូ ដោយប្រើតេឡេទស្សន៍ Warsaw Telescope នៅមន្ទីរអង្កេតតារាសាស្ត្រ Las Campanas Observatory ក្នុងប្រទេសឈីលី។

យោងតាមការស្រាវជ្រាវថ្មីៗនេះបានឲ្យដឹងថា ភពដែលគ្មានគន្លងច្បាស់លាស់ដូចនេះអាចនឹងមានចំនួនច្រើន នៅក្នុងកាឡាក់ស៊ីមីលគីវ៉េរបស់យើង។ ជាការពិតណាស់ ភពឯករាជ្យគឺមិនអាចបញ្ចេញពន្លឺដូចជាផ្កាយ ឬមិនអាចត្រូវបានមើលឃើញនៅក្នុងពន្លឺអាំងប្រាក្រហមនោះទេ ប៉ុន្តែពួកវាអាចនឹងត្រូវបានរកឃើញ តាមរយៈព្រឹត្តិការណ៍មីក្រូឡេនស៊ីង (Microlensing)។

ព្រឹត្តិកាណ៍មីក្រូឡេនស៊ីងកើតឡើង នៅពេលដែលមានវត្តមានរបស់អ្វីមួយ ដែលអាចទាញលំហឲ្យកោង ដូចជាប្រហោងខ្មៅ ប៉ុន្តែបាតុភូតនេះអាចកើតមាន នៅជុំវិញភពផ្សេងៗដែរ។ ឧទាហរណ៍ ប្រសិនបើភពឯករាជ្យមួយស្ថិតនៅស្របជាមួយផ្កាយដ៏សែនឆ្ងាយមួយដួង នោះពន្លឺពីផ្កាយនោះនឹងពត់កោងជុំវិញភពមួយនេះ ជាហេតុនាំឲ្យមានឥទ្ធិពលព្រឹត្តិការណ៍មួយនេះ។ ក្រុមអ្នកស្រាវជ្រាវអាចប្រើប្រាស់ បម្រែបម្រួលនៃពន្លឺកោងជុំវិញភព ដើម្បីគណនារកម៉ាស់របស់ភពនោះ។

រយៈពេលព្រឹត្តិការណ៍មីក្រូឡេនស៊ីងអាចជួយឲ្យអ្នកស្រាវជ្រាវ កំណត់ម៉ាស់នៃអង្គនោះ។ ព្រឹត្តិការណ៍កាន់តែខ្លី អង្គនោះគឺមានម៉ាស់តូច។ ជាធម្មតា ភពនានាដែលស្ថិតនៅក្នុងព្រឹត្តិកាណ៍មីក្រូឡេនស៊ីង មានរយៈពេលពីរបីម៉ោង។ ប៉ុន្តែភពដែលទើបតែរកឃើញមួយនេះ មានរយៈពេលតែ៤២នាទីប៉ុណ្ណោះ ដែលជាព្រឹត្តិការណ៍ខ្លីបំផុត ដែលត្រូវបានបញ្ជាក់៕