ហេតុអ្វីបានជាលោក ELON MUSK មិនចូលចិត្តទៅលើការធ្វើដំណើរកំសាន្ដផ្សេងៗ?

បរទេស៖ ចំពោះអ្នកដែលនិយមតាមដានពត៌មានបរទេសផ្សេងៗ ជាពិសេសពត៌មានដែលទាក់ទងជាមួយនឹងប្រព័ន្ធបច្ចេកវិទ្យាប្រាកដជាស្គាល់មហាសេដ្ឋីសម័យថ្មី គឺលោក Elon Musk។ ថ្មីៗនេះ លោក ទទួលបានជោគជ័យយ៉ាងខ្លាំងជាមួយនឹងក្រុមហ៊ុនឡានអគ្គិសនី Tesla និង ផលិតនូវយាន្ដអវកាស SpaceX ដែលធ្វើឲ្យទ្រព្យសម្បត្តិរបស់លោកកើនឡើងយ៉ាងគំហុក។

មួយវិញទៀត​ លោកត្រូវបានគេវាយតម្លៃថា ជាមហាសេដ្ឋីម្នាក់ដែលមានទ្រព្យសម្បត្ដិរាប់ពាន់លាន ហើយងប់ងល់នឹងការងារយ៉ាងខ្លាំង។ នៅក្នុង ២០១៨ មានបុគ្គលិករបស់លោកនៅក្រុមហ៊ុន Tesla បាននិយាយថា នៅកំឡុងពេលដែលក្រុមហ៊ុនមួយនេះកំពុងព្យាយាមផលិតនូវឡានម៉ូឌែលថ្មី គឺ Tesla Model 3 លោក Elon បានដេកសម្រាកនៅលើកម្រាលឥដ្ឋនៃរោងចក្រផលិតរថយន្ដតែម្ដង។ ដូចនេះហើយទើប Elon ត្រូវបានគេនិយាយថាជាមនុស្សដែលស្រឡាញ់ការងារយ៉ាងខ្លាំង ដែលសុខចិត្តគេងក្នុងរោងចក្រដើម្បីផលិតនូវរថយន្ដឲ្យបានជោគជ័យឆាប់រហ័ស។

បន្ថែមទៀតនោះ Elon Musk ក៏បានពិពណ៌នាថា មិនមែនលោកមិនចង់ធ្វើដំណើរកំសាន្ដទេ​ តែមកពីលោកតែងតែជួបនូវវិបត្តិជាប្រចាំ រាល់ពេលលោកធ្វើដំណើរកំសាន្ដ។ លោកបានលើកឡើងនូវបទពិសោធន៍របស់លោកក្នុងពេលធ្វើដំណើរកំសាន្ដថា លើកទី១ និងទី២ លោកធ្វើដំណើរកំសាន្ដ យាន្ដអវកាស(Rocket) របស់លោកត្រូវបានផ្ទុះទាំង២ដង តែម្ដង។ ដូច្នេះ លោកគិតថាលោកនឹងមិនធ្វើដំណើរកំសាន្ដទៀតទេ ព្រោះលោកគិតថាបើលោកធ្វើកំសាន្ដទៀត ក្រុមហ៊ុនរបស់លោកនឹងរលាយ។

យោងតាមការបកស្រាយខាងលើ អាចបង្ហាញពីមូលហេតុដែលលោកមិនអាចធ្វើដំណើរកំសាន្ដបាន៕