ភ្នំពេញៈ ក្រុមហ៊ុនលក់រថយន្តទំនើបៗជាច្រើន នៅប្រទេសកម្ពុជា បានលក់រថយន្តរបស់ខ្លួនហួសពីគោលដៅកំណត់ ពីឆ្នាំ២០១១ បើទោះបីក្រុមហ៊ុនខ្លះរាយការណ៍ថា ខ្លួនជួបការលំបាកក្នុងការបង្កើនតម្រូវការរថយន្ត ដោយសារផលប៉ះពាល់ពីគ្រោះធម្មជាតិក្តី។
លោក សេង វឿង អ្នកគ្រប់គ្រងទូទៅប្រចាំក្រុមហ៊ុន R.M Asia Co., Ltd ដែលបាននាំចូលរថយន្តម៉ាក ហ្វដ ឲ្យដឹងថា ក្រុមហ៊ុនលោកលក់រថយន្តហួសគោលដៅកំណត់១០ភាគរយ គឺ ៤០០គ្រឿង ក្នុងមួយឆ្នាំ។ តួលេខនេះកើនលើស ឆ្នាំ២០១០ ចំនួន ៣០ភាគរយ។ លោកបញ្ជាក់ថា៖ «យើងបានកត់សម្គាល់ឃើញថា បន្ទាប់ពីយើងបានងើបចេញពីវិបត្តិសេដ្ឋកិច្ចពិភពលោក ដែលបានបង្ខំឲ្យប្រជាជនកាត់បន្ថយការចំណាយរបស់ខ្លួនមក ពួកគេបានចាប់ផ្តើមចំណាយប្រាក់ទិញទំនិញថ្មីទំនើបៗកាន់តែច្រើន ឡើងៗ ក្នុងនោះមានដូចជារថយន្តជាដើម»។
ការលក់របស់ក្រុមហ៊ុនតូយ៉ូតា(ខែមបូឌា) ដែលជាក្រុមហ៊ុនចែកចាយរថយន្តម៉ាកតូយ៉ូតាដ៏ពេញនិយមបំផុតនៅលើទីផ្សារកម្ពុជា មានបរិមាណកើនឡើង ហើយតម្រូវការរថយន្តម៉ាកនេះក៏បានកើនឡើងផងដែរ។ នេះបើតាមលោក គង់ ងួន អគ្គនាយកក្រុមហ៊ុន តូយ៉ូតា(ឃែមបូឌា)។ លោកបន្តថា៖ «យើងទទួលបានតម្រូវការកើនឡើង កាលពីឆ្នាំមុន ដោយសារយើងបានសង្កេតឃើញពីភាពរីកចម្រើននៅក្នុងវិស័យនេះ ក៏ដូចជានៅក្នុងវិស័យទេសចរណ៍ កសិកម្ម កាត់ដេរ វាយនភ័ណ្ឌ និងសំណង់ផង។ ទាំងនេះបានបង្កើនប្រាក់ចំណូលប្រជាពលរដ្ឋ ដូច្នេះពួកគេសប្បាយចិត្តនឹងទិញរថយន្តថ្មី»។
ទោះបីយ៉ាងនេះក្តី ដោយសារតែការទទួលរងផលប៉ះពាល់ពីរលកយក្សស៊ូណាមិនៅជប៉ុន និងទឹកជំនន់នៅថៃ ក្រុមហ៊ុន ជួបការលំបាកក្នុងការបង្កើនតម្រូវការហើយកាលពីឆ្នាំមុន ក្រុមហ៊ុនលក់រថយន្តបានពី ៤៥០ ទៅ ៥០០គ្រឿង តិចជាងគោលដៅកំណត់ ដែលមានដល់១ ៣០០ ទៅ ១ ៥០០គ្រឿង។
លោក គង់ ងួន បានឲ្យដឹងថា គ្រោះធម្មជាតិ ជាបញ្ហាប្រឈមចម្បងជាហេតុធ្វើឲ្យយើងមិនអាចសម្រេចបានគោលដៅ កំណត់ ទោះបីជាមានតម្រូវការច្រើនក៏ដោយ។ លោកបានព្យាករការលក់នៅឆ្នាំនេះ អាចនឹងបាន ១ ៥០០ ទៅ ១ ៧០០គ្រឿង។
លោក ឡុង ណារិទ្ធ នាយកគ្រប់គ្រងក្រុមហ៊ុន ណារីតា ម៉ូទ័រខា (ឃែមបូឌា) ជាក្រុមហ៊ុននាំចូលរថយន្តម៉ាកនីសាន់ បានកត់សម្គាល់ឃើញថា ការលក់របស់ក្រុមហ៊ុនលោក កាលពីឆ្នាំមុន បានកើនឡើង១៥ភាគរយ។
លោកថ្លែងថា៖ «យើងទទួលបានតម្រូវការខ្ពស់ ពីឆ្នាំមុន។ ប៉ុន្តែយើងមិនអាចមានរថយន្តគ្រប់គ្រាន់សម្រាប់ពួកគេបានឡើយ ដោយសារយើងទទួលបានការកក់ច្រើនពេក។ ទឹកជំនន់នៅថៃ បានប៉ះពាល់ដល់រោងចក្ររបស់យើង នៅទីនោះ ដូច្នេះយើងមិនអាចផ្គត់ផ្គង់ជូនអតិថិជនបានគ្រប់គ្រាន់ឡើយ»។
លោក សេង វឿង បានឲ្យដឹងថា តម្រូវការរថយន្តថ្មីសរុបនៅកម្ពុជា មានចំនួនពី ៣ពាន់ ទៅ ៤ពាន់គ្រឿងក្នុងមួយឆ្នាំ ហើយបច្ចុប្បន្នមានក្រុមហ៊ុនលក់រថយន្តទំនើបជាង ១០ក្រុមហ៊ុន នៅកម្ពុជា៕
ដកស្រង់ពី គេហទំព័រ Post Khmer
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
