ខ្សែប្រយុទ្ធអ៊ីតាលីកីឡាករ Lapadula កំពុងចាប់ផ្តើមដំណើរការលើនិតិវិធីក្នុងការទទួលបានសញ្ជាតិប៉េរូ

ប៉េរូ៖ ខ្សែប្រយុទ្ធដើមកំណើតអ៊ីតាលីកីឡាករ Gianluca Lapadula បានចាប់ផ្តើមដំណើរការនិតិវិធីដើម្បីក្លាយជាពលរដ្ឋប៉េរូក្នុងការតំណាងឲ្យប្រទេសអាមេរិកខាងត្បូងមួយនេះក្នុងព្រឹត្តិការណ៍ប្រគួតបាល់ទាត់ពិភពលោកឆ្នាំ ២០២២ នៅប្រទេសកាតា។

រដ្ឋមន្រ្តីក្រសួងការបរទេសប៉េរូលោក Mario Lopez បាននិយាយកាលពីថ្ងៃច័ន្ទថារដ្ឋាភិបាលនឹងជួយសម្រួលដល់ដំណើរការនេះ ដោយបានបញ្ជាក់ពីការរំពឹងទុករបស់លោកទៅកាន់ប្រព័ន្ធផ្សព្វផ្សាយផងដែរ។

លោក Lopez បានប្រាប់វិទ្យុ RPP Noticias ថា“ ការចរចាបានចាប់ផ្តើមនៅថ្ងៃនេះ។ កាលពីប៉ុន្មានថ្ងៃមុនយើងបានដឹងថាកីឡាករបាល់ទាត់រូបនេះចាប់អារម្មណ៍ក្នុងការចុះឈ្មោះនៅឯការិយាល័យកុងស៊ុលមួយ។”

កីឡាករ Lapadula ដែលបច្ចុប្បន្នកំពុងលេងជាមួយក្លឹបអ៊ីតាលីលំដាប់ A Benevento មួយវិញទៀតកីឡាករដែលកើតនៅទីក្រុង Turin រូបនេះមានម្តាយជាជនជាតិប៉េរូនិងឪពុកជនជាតិអ៊ីតាលី។

កីឡាករវ័យ ៣០ ឆ្នាំរូបនេះបានចាប់ផ្តើមអាជីពនៅសាលាយុវជនរបស់ក្លឹប Juventus និងធ្លាប់ប្រកបអាជីពជាមួយក្លឹប Milan, Parma, Pescara និងក្លឹប Genoa ផងដែរ។

គាត់មិនបានជាប់ក្នុងកម្រិតអន្តរជាតិជាន់ខ្ពស់ទេទោះបីជានៅក្នុងឆ្នាំ ២០១៧ គាត់បានស៊ុតបាល់បញ្ចូលទីសម្រាប់ក្រុមជម្រើសជាតិកម្រិត B របស់អ៊ីតាលីក្នុងការប្រកួតមិត្តភាពជាមួយក្រុមជម្រើសជាតិ San Marino យ៉ាងណាក្ដី ។

ក្រោមច្បាប់ថ្មីដែលណែនាំដោយស្ថាប័នគ្រប់គ្រងបាល់ទាត់របស់ FIFA, កីឡាករ Lapadula នឹងមានសិទ្ធិលេងតំណាងឱ្យប្រទេសប៉េរូនៅពេលគាត់ទទួលបានលិខិតឆ្លងដែនថ្មីរបស់គាត់។

លោក Juan Carlos Oblitas ប្រធានផ្នែកកីឡារបស់ FPF បាននិយាយកាលពីសប្តាហ៍មុនថាកីឡាករ Lapadula នឹងត្រូវបានទទួលការស្វាគមន៍បន្ថែមសម្រាប់ក្រុមជម្រើសជាតិប៉េរូ (Blanquirroja) សម្រាប់យុទ្ធនាការប្រកួតជម្រុះ World Cup របស់ពួកគេ។

ប្រភព៖ ទីភ្នាក់ងារសារព័ត៌មានស៊ីនហួរ