ចិនគំរាមសងសឹក​​អាមេរិក ​ជុំវិញការ​លក់​​អាវុធឱ្យកោះតៃវ៉ាន់

ប៉េកាំង៖ ប្រទេសចិនបានធ្វើការព្រមាន ថានឹងចាត់វិធានការណាមួយ​ ​ដើម្បីឆ្លើយតបទៅនឹងសកម្មភាពដ៏គគ្លើនរបស់សហរដ្ឋអាមេរិក ចំពោះ​ការ​ព្រមព្រៀង​លក់ប្រព័ន្ធសព្វាវុធទំនើបៗតម្លៃ ១.៨ពាន់លានដុល្លារឱ្យកោះតៃវ៉ាន់ ដែលប្រទេសចិនតែងចាត់ទុក ថា​​វាជាខេត្តមួយរបស់ខ្លួន។

កាលពីថ្ងៃព្រហស្បតិ៍ម្សិលមិញនេះ ក្រសួងការបរទេសចិន​បាននិយាយថា ​ការអនុម័តការលក់អាវុធ​របស់អាមេរិកឱ្យទៅកោះតៃវ៉ាន់ គឺកំពុងតែរំលោភលើកិច្ចព្រមព្រៀង ដែលបានចុះហត្ថលេខានៅទសវត្សឆ្នាំ ១៩៧០ ដែលជាការបង្កើតទំនាក់ទំនងការទូតរវាងប្រទេសទាំងពីរ។

​គ្រឿងសព្វាវុធដែលអាមេរិកលក់ឱ្យកោះតៃវ៉ាន់នោះរួមមាន ប្រព័ន្ធគ្រាប់រ៉ុក្កែត HIMARS ផលិតដោយក្រុមហ៊ុនឡុកឃីដម៉ាទីន ​​ប្រព័ន្ធមីស៊ីលចម្ងាយឆ្ងាយ SLAM-ER  ផលិតដោយក្រុមហ៊ុនប៊ូអ៊ីង រួមទាំងឧបករណ៍ចាប់សញ្ញាខាងក្រៅសម្រាប់យន្តហោះចម្បាំង។ ហើយសេចក្តីជូនដំណឹង​បន្ថែមទៀត ត្រូវបានគេរំពឹងថា វានឹងមានទាំង យន្តហោះគ្មានមនុស្សបើក ផលិតដោយក្រុមហ៊ុន General Atomics  ​ក៏ដូចជាមីស៊ីលប្រឆាំងនាវាចម្បាំង Harpoon ​សម្រាប់ការពារនៅតាមឆ្នេរសមុទ្រ។

ថ្លែងនៅក្នុងសន្និសីទសារព័ត៌មានមួយ លោក Zhao Lijian ដែលជាអ្នកនាំពាក្យក្រសួងការបរទេសចិនលើកឡើងដូច្នេះថា៖

គួរជម្រាបដែរថា ទីក្រុងប៉េកាំងបានបង្កើនសម្ពាធទាំងការទូត និងយោធាទៅលើកោះតៃវ៉ាន់​ ចាប់តាំងពីការបោះឆ្នោតឆ្នាំ ២០១៦ របស់លោកស្រីប្រធានាធិបតី Tsai Ing-wen ដែលចាត់ទុកកោះនេះ គឺជា​ដែនដីអធិបតេយ្យភាព និងមិនមែនជាផ្នែកមួយនៃគោលនយោបាយ “ចិនតែមួយ” ឡើយ៕