អាឌីសអាបាបា៖ ការិយាល័យមេធាវីទូទៅអេត្យូពីបានឱ្យដឹងកាលពីថ្ងៃពុធថា ប្រទេសអេត្យូពីអាចនឹងកាត់ទោសជនល្មើសឱ្យជាប់ពន្ធនាគាររហូតដល់ ២ឆ្នាំ ប្រសិនបើពួកគេមិនគោរពតាមវិធានការ ទប់ស្កាត់ការឆ្លងរាលដាលនៃជំងឺកូវីដ១៩ ដែលរៀបចំឡើងដោយរដ្ឋាភិបាល។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សវិធានការរិតបន្តឹងថ្មីនេះរួមមាន ការហាមឃាត់មិនឱ្យមានការចាប់ដៃគ្នា ការមិនពាក់ម៉ាសនៅកន្លែងសាធារណៈ ការអង្គុយលើតុមួយដែលមានគ្នាលើសពីបីនាក់ ក៏ដូចជាការដែលមិនបានរក្សាគម្លាតឆ្ងាយពីគ្នាជាដើម។
អេត្យូពីដែលជាប្រទេសមានប្រជាជនច្រើនជាងគេលំដាប់ទី២ នៅទ្វីបអាហ្វ្រិក និងជាប្រទេសមហាអំណាចក្នុងតំបន់ បានប្រកាសដាក់វិធានការគ្រាអាសន្នកាលខែមេសា ដើម្បីទប់ស្កាត់ការរីករាលដាលនៃជំងឺរាតត្បាតកូវីដ១៩នេះ។
គួរឱ្យដឹងដែរថា បច្ចុប្បន្ន ជំងឺកូវីដ១៩នៅប្រទេសនេះបានសម្លាប់មនុស្សអស់ ១,៣៩៦នាក់ ក្នុងចំណោមអ្នកឆ្លងសរុប ៩១,៦៩៣នាក់។ ទន្ទឹមនឹងនេះ អាជ្ញាធរអេត្យូពីកំពុងបង្ហាញការព្រួយបារម្ភថា ករណីឆ្លងថ្មីអាចនឹងកើនច្រើនបន្ថែមទៀត ខណៈពលរដ្ឋហាក់មិនសូវគោរពតាមវិធានការបង្ការជំងឺ៕