ក្រុមបាតុករថៃ ទុកពេលឱ្យលោកនាយករដ្ឋមន្ត្រី​៣ថ្ងៃ ដើម្បី​លាលែងពី​តំណែង

បាងកក៖ ​កាលពីថ្ងៃពុធម្សិលមិញនេះ ក្រុមបាតុករថៃបានប្រកាសទុកពេលឱ្យ​នាយករដ្ឋមន្រ្តីថៃ លោក ប្រាយុទ្ធ ចាន់អូចា ចំនួន៣ថ្ងៃ ដើម្បីចុះចេញពីតំណែង ឬប្រឈមមុខនឹងការធ្វើបាតុកម្មបន្ថែមទៀត។ ប៉ុន្តែទោះបីជាយ៉ាងក្តី មេដឹកនាំក្រុមបាតុករដែលបានធ្វើសេចក្តីប្រកាសនេះ ត្រូវបានចាប់ខ្លួនក្នុងរយៈពេល ២ម៉ោង​។

មេដឹកនាំបាតុករថៃវ័យ២៥ឆ្នាំ កញ្ញា Patsaravalee ‘Mind’ Tanakitvibulpon បានប្រាប់ទៅកាន់ក្រុមបាតុករថា បាតុកម្មរបស់ពួកយើងគឺមិនបញ្ចប់ទៅវិញនោះទេ ដរាបណាលោក ប្រាយុទ្ធ ចាន់អូចា មិនព្រមលាលែងពីតំណែង។ ហើយប្រសិនបើក្នុងរយៈពេល៣ថ្ងៃ គាត់នៅតែមិនព្រមលាលែង នោះគាត់នឹងត្រូវប្រឈមមុខជាមួយពួកយើងបន្តទៅទៀត។

ក្រុមបាតុករថៃរាប់ម៉ឺននាក់ បានប្រមូលផ្តុំគ្នាធ្វើបាតុកម្មនិងដង្ហែក្បួនទៅការិយាល័យរបស់​លោក ប្រាយុទ្ធ ចាន់អូចា នៅឯវិមានរដ្ឋាភិបាល ដើម្បីទាមទារឱ្យលោកចុះចេញពីតំណែង ​រួមទាំងកាត់បន្ថយ​អំណាចព្រះមហាក្សត្រ​។

ថ្លែង​ក្នុងសុន្ទរកថាតាមទូរទស្សន៍ នៅថ្ងៃពុធដដែលនាយករដ្ឋមន្ត្រី​លោក ប្រាយុទ្ធ ក៏​បានលើកឡើងដែរថា លោកបានត្រៀមខ្លួនជាស្រេច ដើម្បីដកវិធានការគ្រាអាសន្នដែលលោកបានដាក់ចេញកាលពីសប្តាហ៍មុន ក្នុងគោលបំណងការបន្ថយស្ថានភាពតានតឹងជាមួយនឹងក្រុមបាតុករ៕