អាមេរិក៖ ជារឿងដ៏រីករាយ និងគួរឲ្យភ្ញាក់ផ្អើលមួយ ដែលលោកយាយអាយុ៩៣ឆ្នាំម្នាក់ ទទួលបានសញ្ញាបត្រមធ្យមសិក្សាទុតិយភូមិក្នុងថ្ងៃខួបកំណើត បន្ទាប់ពីគាត់បង្ខំចិត្ដបោះបង់ការសិក្សាតាំងពីអាយុ១៨ឆ្នាំមកម្ល៉េះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកយាយ Eileen Delaney មកពីទីក្រុងញូយ៉ក នៃសហរដ្ឋអាមេរិក ទើបទទួលបានសញ្ញាបត្របាក់ឌុប ក្នុងថ្ងៃខួបកំណើតរបស់គាត់ នាខែតុលានេះ ដែលផ្ដល់ដោយវិទ្យាល័យ Port Richmond សម្រាប់ថ្នាក់សិក្សាឆ្នាំ១៩៤៥។ នាឱកាសនោះដែរ លោកយាយបានប្រាប់ប៉ុស្ដិ៍ទូរទស្សន៍ WABC ទាំងរំភើបចិត្ដថា៖
គួររម្លឹកថា លោកយាយ Eileen បានបង្ខំចិត្ដឈានជើងចេញពីសាលារៀន នៅពាក់កណ្ដាលឆ្នាំសិក្សាថ្នាក់ទី១២ ដោយសារតែម្ដាយចុងរបស់គាត់ទទូចឲ្យឈប់រៀន ដើម្បីជួយរកលុយ ទ្រទ្រង់លើការចំណាយក្នុងគ្រួសារ។ ពេលនោះ លោកយាយទើបតែមានអាយុ១៨ឆ្នាំប៉ុណ្ណោះ ហើយគាត់ចាប់ផ្ដើមធ្វើការឲ្យក្រុមហ៊ុនទូរសព្ទមួយក្នុងទីក្រុងញូយ៉ក ដែលគាត់គិតថាខ្លួនឯងពិតជាមានសំណាងណាស់ ព្រោះកន្លែងការងារមិនទាមទារសញ្ញាបត្របាក់ឌុប។
ក្រោយមក លោកយាយ Eileen បានរៀបការជាមួយប្ដីឈ្មោះ Eugene A. Delaney ដែលបច្ចុប្បន្ន លោកយាយមានកូនចំនួន ៦នាក់ ចៅ៨នាក់ និងចៅទួត៦នាក់ហើយ។
យ៉ាងណាមិញ ថ្ងៃទទួលសញ្ញាបត្រ ដែលជាថ្ងៃតែមួយនៃការប្រារព្ធពិធីខួបកំណើតឈានចូលអាយុ៩៣ឆ្នាំរបស់លោកយាយ ពុំមានសាច់ញាតិមកចូលរួមផ្ទាល់នោះទេ ប៉ុន្ដែពួកគេបានអបអរដល់លោកយាយតាមវីដេអូខល (Zoom) ដើម្បីរក្សាគម្លាតសង្គម ព្រោះជំងឺកូវីដ-១៩ ក្នុងសហរដ្ឋអាមេរិក នៅតែបន្ដរាតត្បាតខ្លាំងនៅឡើយ៕