Update៖ មនុស្សស្លាប់កើនដល់១០៥នាក់ និង៥លាននាក់រងផលប៉ះពាល់ ដោយសារគ្រោះទឹកជំនន់និងបាក់ដី ក្នុងប្រទេសវៀតណាម

វៀតណាម៖ គ្រោះទឹកជំនន់ និងការរអិលបាក់ដី ដែលបង្កឡើងដោយភ្លៀងធ្លាក់ខ្លាំងអស់រយៈពេលជាច្រើនសប្ដាហ៍ចុងក្រោយនេះ បានសម្លាប់មនុស្សយ៉ាងហោចណាស់ ១០៥នាក់ នៅភាគកណ្ដាលនៃប្រទេសវៀតណាម និងមនុស្សប្រមាណ៥លាននាក់ បានរងផលប៉ះពាល់ដោយសារគ្រោះធម្មជាតិនេះ។

យោងតាមភ្នាក់ងារសារព័ត៌មាន Reuters ដែលរាយការណ៍កាលពីថ្ងៃអង្គារ៍ ទី២០ ខែតុលា ឆ្នាំ២០២០ម្សិលមិញនេះ បានឲ្យដឹងថា ប្រហែលមួយភាគបីនៃអ្នកស្លាប់សរុបគឺជាទាហាន ដែលកប់នៅក្រោមរណ្ដៅភក់ ដោយសារគ្រោះរអិលបាក់ដីនៅឯបន្ទាយរបស់ពួកគេ កាលពីសប្ដាហ៍មុន។ ក្នុងនោះដែរ យ៉ាងហោចណាស់មនុស្សចំនួន ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​២៧នាក់កំពុងបាត់ខ្លួន រួមមានកម្មករសំណង់ចំនួន ១៥នាក់ផងដែរ។

ដោយឡែក ផ្ទះសម្បែងរបស់ប្រជាពលរដ្ឋប្រមាណ១៧៨,០០០ខ្នង ត្រូវបានជន់លិច ខណៈផលដំណាំជិត៧,០០០ហិកតា រងការបំផ្លិចបំផ្លាញ ហើយសត្វចិញ្ចឹមជិត៦៩០,០០០ក្បាល ក៏បានបាត់បង់ជីវិតដោយសារតែទឹកជំនន់ផងដែរ។

ជុំវិញគ្រោះមហន្ដរាយនេះដែរ ទូរទស្សន៍រដ្ឋវៀតណាម VTV បានចុះយកព័ត៌មាន និងបង្ហាញមនុស្សដែលអង្គុយលើដំបូលផ្ទះ ខណៈកំពុងរង់ចាំជំនួយពីក្រុមអ្នកជួយសង្គ្រោះនៅខេត្ដ ក្វាង ប៊ិញ (Quang Binh) បន្ទាប់ពីទឹកជន់លិចផ្លូវ និងកាត់ផ្ដាច់ចរន្ដអគ្គិសនី។ ជាក់ស្ដែង ស្ដ្រីវ័យចំណាស់ម្នាក់ បានប្រាប់អ្នកយកព័ត៌មានខណៈពេលកំពុងជាប់គាំងនៅលើដំបូលផ្ទះថា៖

យ៉ាងណាមិញ អ្នកស្រី Thi Xuan Thu ដែលជាប្រធានសមាគមកាកបាទក្រហមវៀតណាម បានចាត់ទុកថានេះ ជាគ្រោះមហន្ដរាយដ៏អាក្រក់បំផុត ប្រចាំទសវត្សរ៍ ខណៈប្រជាជនរាប់លាននាក់ កំពុងដោះស្រាយបញ្ហាជីវភាព ដែលរងផលប៉ះពាល់ដោយសារជំងឺរាតត្បាតសកលកូវីដ-១៩។

គួរឲ្យដឹងដែរថា ទីភ្នាក់ងារអាកាសធាតុរបស់ប្រទេសវៀតណាមបាននិយាយថា ប្រទេសវៀតណាមក៏កំពុងត្រៀមខ្លួនទប់ទល់នឹងព្យុះត្រូពិកមួយទៀតឈ្មោះ សូឌែល (Suadel) ដែលនឹងមកដល់តំបន់ភាគកណ្តាលនៃ​ប្រទេស នាថ្ងៃសៅរ៍ចុងសប្ដាហ៍នេះ ហើយវានឹងនាំមកនូវភ្លៀងធ្លាក់ ដែលអាចបង្កជាទឹកជំនន់ដ៏អាក្រក់បំផុតថែមទៀត សម្រាប់ឆ្នាំនេះ៕

សូមទស្សនារូបភាពបន្ថែមនៅខាងក្រោម៖