បារាំង៖ ក្នុងការប្រកួតបើកឆាកពូល H ព្រឹត្តិការណ៍ Champions League កាលពីរាត្រីថ្ងៃអង្គារម្សិលមិញ ក្រុមបិសាចក្រហម Manchester United ធ្វើបានយ៉ាងល្អ ដោយទៅយកឈ្នះ ក្លិប Paris Saint-Germain ដល់ទឹកដី Parc des Princes ក្នុងលទ្ធផល២ទល់នឹង១។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបើមើលទៅលើស្ថិតិនៃការប្រកួតឃើញថា ក្រុមទាំងពីរមានឱកាសម្រុកស្មើគ្នា ពោលក្រុមម្ចាស់ផ្ទះ PSG ស៊ុតបាន១០ជើង ចំគោលដៅ៤ដង ចំណែកឯក្រុម Man UTD ស៊ុតបាន១០ជើងដូចគ្នា ចំគោលដៅ៥ដង។
ក្នុងការប្រកួតដ៏ស្វិតស្វាញនេះ ក្រុមភ្ញៀវជាអ្នកបើកគណនីនាំមុខមុននៅនាទីទី២៤ ដែលជាការស៊ុតប៉េណាល់ទីរបស់ខ្សែបម្រើ Bruno Fernandes ខណៈលទ្ធផល០ទល់នឹង១នេះ រក្សាដល់បញ្ចប់តង់ទី១។ លុះឈានចូលដល់តង់ទី២ នៅនាទីទី៥៥ ក្រុម PSG ក៏មានឱកាសតាមស្មើ ដែលជាការភ្លាត់ធ្វើឲ្យចូលទីខ្លួនឯងរបស់ខ្សែប្រយុទ្ធកក្រុម Man UDT កីឡាករ Anthony Martial ។
យ៉ាងណាមិញ ប្រកួតលើកនេះ ក៏មិនខុសពីការប្រកួតវគ្គ១៦ក្រុមកាលពីរដូវកាល២០១៨/១៩ ផងដែរ ដោយកាលនោះខ្សែប្រយុទ្ធ Marcus Rashford ស៊ុតបាល់ប៉េណាល់ទីចុងម៉ោង ជួយ Man UTD ទម្លាក់ PSG ឡើងទៅវគ្គ៨ក្រុម ហើយកាលពីយប់មិញនេះ ជើងស៊ុតជម្រើសជាតិអង់គ្លេស នៅតែធ្វើឲ្យក្រុមយក្សបារាំង ទឹកភ្នែកចុងម៉ោងដដែល ដោយរូបគេបានសម្រេចទី តាមរយៈការស៊ុតកាច់យ៉ាងល្អ នៅនាទីទី៨៧ ធានា៣ពិន្ទុឲ្យក្រុមបិសាចក្រហមតែម្ដង។
តាមរយៈលទ្ធផលខាងលើ បានជួយក្រុម Man UTD ឡើងមកឈេរលេខ១ ក្នុងពូល H ជាបណ្ដោះអាសន្ន មាន៣ពិន្ទុស្មើគ្នាជាមួយក្រុមលេខ២ RB Leipzig ដែលយកឈ្នះក្រុម Istanbul Basakshir ២-០ ក្នុងទឹកដីរបស់ខ្លួន កាលពីយប់មិញដែរនោះ។
គួរបញ្ជាក់ដែរថា ជ័យជម្នះកាលពីយប់មិញ ជាការឈ្នះចំនួន១០ប្រកួតក្រៅដីជាប់ៗគ្នារបស់ក្រុម Man UTD ជាលើកដំបូងក្នុងប្រវត្តិសាស្ត្រក្លិប៕
បើចង់ឃើញការស៊ុតបញ្ចូលទីជក់ចិត្តយ៉ាងណានោះ សូមទស្សនាវីដេអូខាងក្រោម៖