យេរូសាឡឹម៖ កាលពីថ្ងៃអង្គារម្សិលមិញនេះ ទាហានអ៊ីស្រាអែលបានប្រើឧបករណ៍ចាប់សញ្ញានៅក្រោមដី និងបានរកឃើញរូងក្រោមដីថ្មីមួយប្រវែង ៦៥គីឡូម៉ែត្រ ដែលគេជីកចេញពីតំបន់ហ្គាហ្សា ចូលមកតំបន់ភាគខាងត្បូងស្ថិតនៅក្នុងប្រទេសអ៊ីស្រាអែល។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រោយប្រកាសដំណឹងនេះបានតែបន្តិច ក្រុមសកម្មប្រយុទ្ធហាម៉ាស ដែលគ្រប់គ្រងនៅតំបន់ហ្គាហ្សា បានបាញ់រ៉ុក្កែតមួយគ្រាប់សំដៅមកទឹកដីអ៊ីស្រាអែល ប៉ុន្តែត្រូវបានចាប់ស្ទាក់ដោយប្រព័ន្ធការពារដែនអាកាស Iron Dome ។ ហើយដើម្បីជាការឆ្លើយតបទៅវិញ អ៊ីស្រាអែលបានបញ្ជូនយន្តហោះទម្លាក់គ្រាប់បែក ទៅវាយប្រហារទីតាំងក្រុមហាម៉ាសមួយ ស្ថិតនៅភាគខាងត្បូងតំបន់ហ្គាហ្សា។
ប៉ាឡេស្ទីនបានប្រើប្រាស់រូងក្រោមដីជាច្រើន ដើម្បីរត់ពន្ធទំនិញពាណិជ្ជកម្មគ្រប់ប្រភេទទៅកាន់ហ្គាហ្សា ក៏ដូចជានាំយកអាវុធសម្រាប់ក្រុមសកម្មប្រយុទ្ធហាម៉ាស និងក្រុមដទៃទៀត។ មិនតែប៉ុណ្ណោះ ពួកគេក៏បានប្រើប្រាស់រូងក្រោមដីនេះ ដើម្បីបើកការវាយប្រហារនៅខាងក្នុងទឹកដីអ៊ីស្រាអែលផងដែរ។
គួរជម្រាបដែរថា អ៊ីស្រាអែលនិងក្រុមហាម៉ាសបានធ្វើសង្រ្គាមទ្រង់ទ្រាយធំចុងក្រោយក្នុងឆ្នាំ២០១៤ រួមទាំងការប្រយុទ្ធគ្នាឆ្លងព្រំដែនតូចៗរាប់សិបលើកទៀត។ ហើយចាប់តាំងពីសង្គ្រាមឆ្នាំ២០១៤ រហូតមកដល់ពេលនេះ ទាហានអ៊ីស្រាអែលបានរកឃើញរូងក្រោមដីប្រមាណ ២០កន្លែងផ្សេងៗគ្នា៕