អេស៉្បាញ៖ សម្រាប់ការប្រកួតបើកឆាកវគ្គចែកពូលពានរង្វាន់ UEFA Champions League យប់មិញនេះ ក្លិបអ្នកមានបុណ្យ Barcelona រកបាន៣ពិន្ទុដ៏មានសារៈសំខាន់ ក្រោយយកឈ្នះក្លិបមកពីប្រទេសហុងហ្គារី Ferencvaros ដោយលទ្ធផល៥ទល់នឹង១។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកីឡាករប្រធានក្រុម Lionel Messi ជាអ្នករកបានមួយគ្រាប់មុនគេ ដោយការស៊ុតបាល់ប៉េណាល់ទីនៅនាទីទី២៧ ក្រោយរូបគេត្រូវបានខ្សែការពាររបស់ក្លិប Ferencvaros ទាក់ជើងឲ្យដួលក្នុងតំបន់គ្រោះថ្នាក់។ ចូលដល់នាទីទី៤២ តារាវ័យ១៧ឆ្នាំ Ansu Fati រកបានគ្រាប់ទី២ឲ្យ Barca ក្រោមការចុចបាល់ឲ្យ រំលងខ្សែការពារយ៉ាងស្អាតពីសំណាក់កីឡាករ Frenkie de Jong ។
ចូលដល់តង់ទី២ Barcelona រកបាន៣គ្រាប់បន្ថែមទៀត បើទោះបីជាកីឡាករ Gerard Pique ទទួលបានកាតក្រហមក៏ដោយ។ ៣គ្រាប់នោះដែររកបានដោយកីឡាករ Philippe Coutinho, Pedri និង Ousmane Dembele។ ជាមួយគ្នានេះដែរ Ferencvaros ក៏មានឱកាសតាមពីក្រោយមួយគ្រាប់ផងដែរ ដោយការស៊ុតបាល់ប៉េណាល់ទីរបស់កីឡាករ Ihor Kharatin ។
យោងតាមលទ្ធផលនេះ Barcelona ឈរនៅកំពូលតារាងពូល G មានបីពិន្ទុស្មើនឹងក្លិប Juventus ដែលទើបនឹងឈ្នះក្លិប Dynamo Kyiv ដោយលទ្ធផល២ទល់នឹង០កាលពីយប់មិញដែរនោះ៕
ប្រភព៖ bbc