ហោះដេញតាមរយៈពេល២ឆ្នាំ ទីបំផុតនៅថ្ងៃស្អែកនេះ យានរបស់ណាសានឹងចុះចត ហើយប្រមូលសំណាកពីអាចម៍ផ្កាយមួយ

អាមេរិក៖ យានអវកាសរបស់អង្គការណាសានឹងសាងប្រវត្តិសាស្ត្រថ្មី នៅក្នុងសប្ដាហ៍នេះ ជាមួយអាចម៍ផ្កាយដែលនៅជិតផែនដី។ បេសកកម្មរបស់ទីភ្នាក់ងារអវកាសមួយនេះនឹងប៉ុនប៉ងប្រមូលសំណាកពីអាចម៍ផ្កាយមួយ ដែលនឹងត្រូវបញ្ជូនត្រឡប់មកកាន់ផែនដីវិញ។ យានអវកាស OSIRIS-REx បាននិងកំពុងធ្វើដំណើរតាមគន្លងរបស់អាចម៍ផ្កាយ Bennu ចាប់តាំងពីចុងឆ្នាំ២០១៨។ គួរបញ្ជាក់ផងដែរថា បេសកកម្មមួយនេះបានចាប់ផ្ដើមតាំងពី ខែកញ្ញា ឆ្នាំ២០១៦។

ចាប់តាំងពីបានហោះតាមអាចម៍ផ្កាយ Bennu យានអវកាសភ្ជាប់កាំមេរ៉ាជាច្រើនមួយនេះបានប្រមូលនិងបញ្ជូនទិន្នន័យនិងរូបភាព ត្រឡប់មកកាន់ផែនដីវិញ ដើម្បីជួយក្រុមអ្នកសិក្សាបន្ថែមទៀត អំពីសមាសធាតុនិងបង្កើតផែនទីរបស់អាចម៍ផ្កាយ សម្រាប់ទីតាំងចុះចតដែលមានទីតាំងល្អបំផុត ដើម្បីប្រមូលសំណាក។

ព្រឹត្តិការណ៍សំខាន់នៃបេសកកម្មដែលត្រូវបានគេហៅថា ព្រឹត្តិកាណ៍ចុះចតនិងប្រមូលសំណាក ត្រូវបានគេកំណត់នៅថ្ងៃទី២១ ខែតុលា ម៉ោង៤ទៀបភ្លឺ (ពេលវេលានៅកម្ពុជា)។ អាចម៍ផ្កាយនិងយានអវកាសបច្ចុប្បន្នមានចម្ងាយ ៣៣៣លានគីឡូម៉ែត្រពីផែនដី ដែលនឹងមានការពន្យារពេលទំនាក់ទំនងពីគ្នាប្រហែល១៨.៥នាទី។ យានអវកាសនេះនឹងធ្វើការប្រមូលសំណាកដោយស្វ័យប្រវត្តិ ពីព្រោះការបញ្ជាពីផែនដីមានភាពយឺតយ៉ាវ និងមិនអាចធ្វើទៅរួច។

យានអវកាស OSIRIS-REx អាចនឹងត្រូវបានពន្យារពេលបេសកកម្មរបស់ខ្លួន ប្រសិនបើមានហេតុការណ៍គ្រោះថ្នាក់ កំឡុងពេលចុះទៅប្រមូលសំណាក។ ប៉ុន្តែប្រសិនបើអ្វីៗដំណើរការយ៉ាងរលូន យានអវកាសនិងសំណាកដ៏មានតម្លៃនឹងចាប់ផ្ដើមដំណើរដ៏វែងឆ្ងាយ ត្រឡប់មកកាន់ផែនដីវិញនៅឆ្នាំក្រោយ ហើយនឹងមកដល់ផែនដីវិញនៅឆ្នាំ២០២៣៕