អ្នកស្ម័គ្រចិត្ត៦នាក់ ចំណាយពេល៥០ម៉ោង បោសសម្អាតផ្ទះឲ្យបុរសវ័យចំណាស់ម្នាក់ ដែលខានសម្អាតចាប់តាំងពីប្រពន្ធស្លាប់បាត់ទៅ

អង់គ្លេស៖ ផ្ទះមួយខ្នង មានបន្ទប់គេងចំនួនពីរ ដែលមានទីតាំងស្ថិតនៅ Cumbria នៃប្រទេសអង់គ្លេស និងជាកម្មសិទ្ធរបស់បុរសពោះម៉ាយម្នាក់វ័យខ្ទង់៨០ឆ្នាំ បានក្លាយទៅជាផ្ទះដ៏កខ្វក់ បន្ទាប់ពីប្រពន្ធរបស់គាត់បានស្លាប់បាត់ទៅ និងខានសម្អាតជាច្រើនឆ្នាំ។

ហើយថ្មីៗនេះ មានបុគ្គលិកផ្នែកបោសសម្អាតចំនួន៦នាក់ បានស្ម័គ្រចិត្តចូលទៅធ្វើការបោសសម្អាត ដោយចំណាយអស់​រយៈពេល៥០ម៉ោង រហូតដល់ស្អាត និងមានផាសុកភាពឡើងវិញ។

យោងតាមសម្ដីរបស់បុគ្គលិកផ្នែកបោសសម្អាតម្នាក់ មានឈ្មោះថា អេម៉ា បានប្រាប់ប្រភពសារព័ត៌មានឲ្យដឹងថា ក្រុមការងារទាំងអស់បានពាក់ម៉ាស់ និងពាក់ឯកសណ្ឋានការពារយ៉ាងល្អ មុនពេលចូលទៅធ្វើការបោសសម្អាតក្នុងផ្ទះ។ ក្នុងនាមនាងមកពីក្រុមហ៊ុនបោសសម្អាត នាងតែងតែបានឃើញពីស្ថានភាពផ្ទះកខ្វក់ផ្សេងៗពីគ្នា តែផ្ទះរបស់បុរសវ័យចំណាស់នេះ មានសភាពកខ្វក់ខ្លាំងបំផុត ដែលនាងមិនធ្លាប់ឃើញពីមុនមក។ ចំណែកឯផ្ទះបាយ និងបន្ទប់ទឹកវិញ ត្រូវបានជួសជុលឡើងវិញផងដែរ ដោយសារតែមានការខូចខាតខ្លាំងពេក។ ហើយការបោសសម្អាតនេះ ត្រូវបានធ្វើឡើង បន្ទាប់ពីទទួលការស្នើសុំពីសំណាក់មិត្តភក្ដិរបស់បុរសវ័យចំណាស់។

យ៉ាងណាមិញ ក្រោយពីបោសសម្អាតបានជោគជ័យរួចមក បុគ្គលិកទាំង៦នាក់ ស្ទើរតែស្រក់ទឹកភ្នែក ដោយសារតែបានឃើញពីភាពខុសប្លែកទាំងស្រុងនៃស្ថានភាពផ្ទះ។ ហើយនាង អេម៉ា ក៏សង្ឃឹមដែរថា អ្នកដទៃទៀតនឹងមិនខ្មាសអៀនឡើយ ក្នុងការស្នើសុំឲ្យជួយបោសសម្អាតផ្ទះ បើទោះបីជាកខ្វក់ខ្លាំងយ៉ាងណាក៏ដោយ៕

សូមទស្សនារូបភាពខាងក្រោម៖