កូរ៉េខាងត្បូង៖ កាលពីល្ងាចថ្ងៃទី ១៦ ខែ តុលា មានពាណិជ្ជកម្មដាក់លក់ទារកដ៏គួរឱ្យតក់ស្លុតមួយត្រូវបានបង្ហោះនៅលើទីផ្សារអនឡាញដ៏ធំមួយរបស់ប្រទេសកូរ៉េខាងត្បូង Daangn Market។
ពាណិជ្ជកម្មនោះនិយាយអំពី «ទារកទើបនឹងកើតបាន ៣៦ សប្តាហ៍ សម្រាប់លក់» ហើយបន្ទាប់មកវាក៏បង្ហាញពីរូបថតពីរសន្លឹករបស់ទារកដែលកំពុងគេងលក់យ៉ាងស្រួល។ នៅពីក្រោមរូបនោះបានបញ្ជាក់ថា ទារកម្នាក់នេះគឺកំពុងតែត្រូវការអ្នកយកទៅចិញ្ចឹមនៅក្នុងតម្លៃ ₩200,000 ($175.10 USD) ភ្លាមនោះនៅពេលមានអ្នកបានឃើញពាណិជ្ជកម្មនោះ ក៏បានបង្ហាញពីការមិនពេញចិត្ត ហើយក៏មានមនុស្សម្នាក់បានធ្វើការទាក់ទងទៅរហូតដល់បានជួបជាមួយនឹងអ្នកលក់ផ្ទាល់តែម្តង។
អ្នកលក់ម្នាក់នោះបានបង្ហើបថា ខ្លួនគឺជាម្តាយរបស់ទារកនោះ ហើយក៏មានអាយុ ២៧ ឆ្នាំ នាងបានប្រាប់ថា «មិនមាន លទ្ធភាពគ្រប់គ្រាន់ចិញ្ចឹមកូនតែម្នាក់ឯងដោយគ្មានឪពុកក្មេងនោះទេ»។ ខណៈពេលដែលពាណិជ្ជកម្មមួយនោះត្រូវបានអ្នកនិយមប្រើអនឡាញធ្វើការប្រឆាំងយ៉ាងច្រើនបែបនេះ ប៉ូលីសក៏ចាប់ផ្តើមស៊ើបអង្គេតរកទីតាំងរបស់ស្ត្រីម្នាក់នោះ នៅក្រោមការជួយរបស់ប៉ូលីស Seogwipo។
ការស៊ើបអង្គេតបានរកឃើញថា អ្នកម្តាយម្នាក់នេះបានផ្តល់កំណើតឱ្យទារកនោះតែម្នាក់ឯង នៅជំរុំអ្នកម្តាយ កាលពីថ្ងៃ ទី ១៤ ខែ តុលា នាងក៏សម្រេចចិត្តដាក់ទារកតូចនោះសម្រាប់លក់ ខណៈពេលដែលខ្លួនកំពុងតែសម្រាកព្យាបាលសុខ ភាពនៅក្នុងមជ្ឈមណ្ឌលសាធារណៈមួយ។ បើយោងតាមការរាយការណ៍គេបានឳ្យដឹងថា «នាងមិនបានដឹងថាខ្លួនមានផ្ទៃពោះ រហូតទាល់តែជិតដល់ថ្ងៃសម្រាល»។
ប៉ូលីសបានប្រាប់ថានៅពេលនេះ ទារកមានសុវត្ថិភាពហើយ និងកំពុងស្ថិតនៅក្រោមការមើលថែយ៉ាងល្អ ហើយ ប៉ូលីស ក៏កំពុងធ្វើការស៊ើបអង្កេតទៅលើស្ត្រីជាម្តាយ ដែលបានប្រព្រឹត្តបទល្មើសទៅនឹងច្បាប់កុមារ។
ប្រជាជនកូរ៉េបានបង្ហាញនូវការមិនពេញចិត្ត ព្រមទាំងបានបញ្ចេញមតិខ្វាយខ្វល់ជាច្រើនសម្រាប់អនាគតរបស់ ទារក តូចម្នាក់នោះ៕
សូមទស្សនាវីដេអូខាងក្រោម៖
ប្រភព៖ 1