អង់គ្លេស៖ ក្រុមបិសាចក្រហម Manchester United ហាក់កែប្រែទម្រង់លេងបានប្រសើរជាងមុន ក្រោយចាប់ផ្ដើមមិនសូវបានល្អនៅរដូវកាលនេះ ជាក់ស្ដែងនៅក្នុងការប្រកួតក្របខណ្ឌ Premier League សប្ដាហ៍ទី៥ កាលពីរាត្រីថ្ងៃសៅរ៍ម្សិលមិញនេះ ពួកគេបានទៅយកឈ្នះក្រុមម្ចាស់ផ្ទះសារិកាព្រៃ Newcastle United នៅទឹកដី St James’ Park ដោយលទ្ធផលគាប់ប្រសើរ ១ទល់នឹង៤។

ក្នុងការប្រកួតនេះក្រុមម្ចាស់ផ្ទះមានឱកាសនាំមុខមុនតាំងពីនាទីទី២មកម្ល៉េះ ដែលជាការភ្លាត់ធ្វើឲ្យចូលទីខ្លួនឯងរបស់ខ្សែការពារ Luke Shaw។ ដោយរំលងបាន២០នាទីជាង ក្រុម Man UTD ក៏រកបានតាមស្មើ តាមរយៈការតែតរបស់ប្រធានក្រុម Harry Marguire

លុះឈានចូលដើមតង់ទី២ ក្រុមលោក Ole Gunnar Solskjaer ទទួលបានបាល់ពិន័យ១១ម៉ែត្រ១គ្រាប់ តែជាអកុសលខ្សែបម្រើ Bruno Fernandes ធ្វើមិនបានសម្រេច ដែលនេះជាការភ្លាត់ទាត់បាល់ប៉េណាល់ទីមិនចូលជាលើកទី១ហើយសម្រាប់ជម្រើសជាតិព័រទុយកាល់រូបនេះ ចាប់តាំងពីផ្លាស់ពីក្លិប Sportoing Lisbon មកចូលរួមជាមួយ Man UTD មក។

យ៉ាងណាមិញ ការប្រកួតអូសបន្លាយដល់ចុងតង់ទី២ ក្រុមលោក Ole ក៏រកបន្ថែមបានរហូតដល់៣គ្រាប់ឯណោះ ពោលគឺធ្វើបាន Bruno នៅនាទីទី៨៦ ខ្សែការពារ Aaron Wan-Bissaka នៅនាទីទី៩០ និងខ្សែប្រយុទ្ធ Marcus Rashford នៅនាទី៩០+៦ ។ជាមួយគ្នានេះដែរ ក្នុងចំណោម៣គ្រាប់នោះ កើតចេញពីការបញ្ជូនរបស់ Rashford ២គ្រាប់ និង Bruno ១គ្រាប់។

Bruno Fernandes
Aaron Wan-Bissaka

តាមរយៈលទ្ធផលខាងលើ បានជួយរុញ Man UTD ឡើងមកឈរលេខ៩ មាន៧ពិន្ទុ ខណៈក្រុម Newcastle​ ធ្លាក់ទៅឈរលេខ១១ មាន៧ពិន្ទុដូចគ្នា។

គួរឲ្យដឹងដែរថា យប់មិញនេះ ជាលើកទី៣ហើយសម្រាប់ Rashford ដែលរួមចំណែករកគ្រាប់បាល់បាន៣គ្រាប់ (ស៊ុត១ បញ្ជូន២) ក្នុងមួយប្រកួតនៅ Premier League បែបនេះ ពោលគឺគេធ្លាប់ធ្វើបានកាលលេងទល់នឹង Fulham នៅខែធ្នូ ឆ្នាំ២០១៨ម្ដង និងលេងទល់នឹង Arsenal កាលពីខែកក្កដា ឆ្នាំ២០១៦ម្ដង៕

Marcus Rashford 

បើចង់ឃើញការស៊ុតបញ្ចូលទីអស្ចារ្យយ៉ាងណានោះ សូមទស្សនាវីដេអូខាងក្រោម៖

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]