បរទេស៖ វាតែងតែកើតមានគ្រប់ពេល នៅពេលបទចម្រៀងមួយបទកំពុងបន្លឺសំឡេងក្នុងខួរក្បាលរបស់អ្នក ហើយអ្នកព្យាយាមគ្រហឹមតាមបទចម្រៀងនោះទៅកាន់មិត្តភក្ដិរបស់អ្នក ដើម្បីឲ្យពួកគេជួយប្រាប់ពីចំណងជើង។ អ្នកនៅតែគិតពីបទចម្រៀងនោះ រហូតដល់ពេលអ្នកបានលឺបទចម្រៀងមួយបទនោះម្ដងទៀត នៅតាមទីសាធារណៈ។

ឥឡូវនេះ កម្មវិធី Google មានវិធីថ្មីក្នុងការកំណត់អត្តសញ្ញាណបទចម្រៀង សម្រាប់អ្នក។ អ្នកអាចគ្រហឹម ច្រៀង ឬហួចតាមបទចម្រៀង ទៅកាន់ទូរសព្ទរបស់អ្នក។ យ៉ាងណាមិញ បច្ចេកវិទ្យាក្នុងការស្វែងរកសំឡេងដែលត្រូវជាមួយទិន្នន័យនៃបទចម្រៀងនានា តាមរយៈការច្រៀង គ្រហឹម និងហួចជំនួសឲ្យការប្រើប្រាស់ទំនុកច្រៀងតែឯង បានកើតមានជាងមួយទសវត្សរ៍កន្លងមកហើយ នៅក្នុងកម្មវិធី SoundHound តាំងពីឆ្នាំ២០០៩។

គ្រាន់តែច្រៀង គ្រហឹម ឬហួចតាមសូរនៃបទចម្រៀង នោះ Google នឹងអាចដឹងពីបទដែលអ្នកចង់បាន

ដើម្បីចាប់ផ្ដើមប្រើប្រាស់មុខងារថ្មីរបស់កម្មវិធី Google អ្នកត្រូវច្បាស់ថា កម្មវិធី Google របស់អ្នកស្ថិតនៅជំនាន់ចុងក្រោយ។ បន្ទាប់មក អ្នកគ្រាន់តែចុចលើសញ្ញាក្បាលមេក្រូលើកន្លែងស្វែងរកនៃកម្មវិធី ហើយចាប់ផ្ដើមនិយាយថា "what's this song?" រួចចាប់ផ្ដើមគ្រហឹម ច្រៀង ឬហួចតាមសូរនៃបទចម្រៀង ដើម្បីស្វែងរកចម្លើយ។

វាកាន់តែងាយស្រួលក្នុងការស្វែងរកបទចម្រៀង នៅលើកម្មវិធី Google 

ប្រសិនបើអ្នកប្រើប្រាស់មុខងារ Google Assistant វិញ អ្នកគ្រាន់តែនិយាយថា "Hey Google, what's this song?" រួចចាប់ផ្ដើមគ្រហឹមតាមសូរនៃបទចម្រៀង។ លទ្ធផលនៃការស្វែងរកអាចនឹងមានច្រើន ហើយអ្នកអាចជ្រើសរើសស្ដាប់បទចម្រៀងមួយណា ដែលត្រូវជាមួយនឹងអ្វីដែលអ្នកធ្លាប់បានលឺពីមុនមក។

ក្រុមហ៊ុន Google បានប្រកាសដាក់ឲ្យប្រើប្រាស់នូវមុខងារមួយនេះជាសកល កាលពីថ្ងៃព្រហស្បតិ៍ ទាំងអ្នកប្រើ iPhone និង Android។ បច្ចុប្បន្ន វាគាំទ្រច្រើនជាង២០ភាសានៅលើ Android និងនៅលើ iPhone មានតែមួយភាសាប៉ុណ្ណោះ គឺភាសាអង់គ្លេស៕

វីដេអូ

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ