Chen របស់​ក្រុម​ EXO នឹង​ចូល​បម្រើ​ជួរ​យោ​ធា​នៅ​ខែ​នេះ​

ភ្នាក់ងាររបស់ Chen បាននិយាយកាលពីថ្ងៃសុក្រថា Chen ដែលជាសមាជិកក្រុមចម្រៀងប្រុសរបស់ក្រុមចម្រៀងកូរ៉េ EXO នឹងចូលបម្រើជួរយោធានៅចុងខែនេះដើម្បីបំពេញកាតព្វកិច្ចរបស់គាត់។

គេហទំព័ររបស់ SM Entertainment បានអោយដឹងថាបុរសអាយុ ២៨ឆ្នាំគឺ Kim Jong-dae (Chen) បាន​ចូលទៅចុះឈ្មោះដោយបំពេញដាក់ថា នឹងធ្វើកាតព្វកិច្ចនៅថ្ងៃទី ២៦ ខែតុលា។ ហើយទីភ្នាក់ងារមិនបានបញ្ជាក់​លំអិត​អំពីទីកន្លែង និងកាលវិភាគនៃការចុះឈ្មោះចូលជាសមាជិកនោះទេ។

គាត់បានសរសេរលិខិតមួយផ្ញើទៅអ្នកគាំទ្រថា៖ “ខ្ញុំនឹងបំពេញកាតព្វកិច្ចរបស់ខ្ញុំអោយបានល្អ ហើយខ្ញុំនឹងត្រឡប់មក​វិញ ដើម្បីនិយាយសួស្តីក្នុងនាមជាមនុស្សដែលមានភាពចាស់ទុំម្នាក់”។ ក្នុងពេលនោះផងដែរលោក Chen បានចេញ បទថ្មីរបស់គាត់គឺបទ "Hello" កាលពីថ្ងៃព្រហស្បតិ៍នេះផងដែរ។

សូមបញ្ជាក់ថា បន្ទាប់ពីមានសេចក្តីប្រកាសរៀបអាពាហ៍ពិពាហ៍ដ៏គួរឱ្យភ្ញាក់ផ្អើលមួយនៅក្នុងខែមករាកន្លងមក ឥឡូវ​គាត់បានក្លាយជាឪពុកគេហើយដោយកូនគាត់ជាកូនស្រី៕