ឥណ្ឌា៖ ស្ត្រីម្នាក់ មិនបញ្ចេញឈ្មោះ មានអាយុ៣៥ឆ្នាំ ត្រូវបានបុរសជាប្ដីចាប់ឃុំក្នុងបន្ទប់ទឹកអស់រយៈពេល១៨ខែ ហើយត្រូវបានប៉ូលិស និងមន្ត្រីសុខុមាលភាពក្នុងភូមិ Panipat នៅទីក្រុង Delhi ជួយសង្គ្រោះកាលពីថ្ងៃអង្គារទី១៣ ខែតុលាដើមសប្ដាហ៍នេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមប្រភពព័ត៌មានក្នុងស្រុក បានឲ្យដឹងថា បុរសជាប្ដីឈ្មោះ Naresh Kumar បានចាប់បង្ខំឲ្យប្រពន្ធរស់នៅក្នុងបន្ទប់ទឹកទំហំយ៉ាងតូចចង្អៀត និងមានថ្ងៃខ្លះបង្អត់អាហារប្រពន្ធទៀតផង។ ហើយការជួយសង្គ្រោះនេះ ត្រូវបានធ្វើឡើង បន្ទាប់ពីអ្នកស្រុក បានរាយការណ៍ទៅកាន់មន្ត្រីការពារស្ត្រីក្នុងស្រុក និងជូនដំណឹងបន្ដទៅកាន់ប៉ូលិសតែម្ដង។
លុះពេលចុះទៅដល់ គេបានប្រទះឃើញស្ត្រីរងគ្រោះដេកនៅលើឥដ្ឋបបន្ទប់ទឹកយ៉ាងអណោចអធ័ម ដោយស្ថិតក្នុងសភាពទន់ខ្សោយ រហូតដល់ដើរមិនរួចផងដែរ។
ប្រភពបានបន្ដទៀតថា ស្ត្រីរងគ្រោះ បានរៀបការជាមួយនឹងប្ដីអស់រយៈពេល១៧ឆ្នាំមកហើយ និងសព្វថ្ងៃនេះ មានកូនចំនួន៣នាក់ ដែលមានអាយុចន្លោះពី១១ឆ្នាំ ដល់១៥ឆ្នាំ។
ជុំវិញករណីខាងលើនេះ បុរសជាប្ដីបានអះអាងថា ប្រពន្ធរបស់ខ្លួនមានជំងឺផ្លូវចិត្ត ហើយនៅពេលមន្ត្រីការពារស្ត្រីក្នុងស្រុក ស្នើសុំឯកសារបញ្ជាក់ពីជំងឺរបស់ប្រពន្ធ ខាងប្ដីមិនមានអ្វីមកបញ្ជាក់ឡើយ។
យ៉ាងណាមិញ មន្ត្រីការពារស្ត្រីក្នុងស្រុក បានព្យាយាមនិយាយជាមួយនឹងស្ត្រីរងគ្រោះផងដែរ ដោយកត់សម្គាល់ឃើញថា នាងមិនមានជំងឺផ្លូវចិត្ត ដូចដែលប្ដីអះអាងឡើយ។ ហើយនាងក៏ត្រូវបានបញ្ជូនទៅកាន់មន្ទីរពេទ្យ ដើម្បីពិនិត្យសុខភាព មុនពេលបញ្ជូនឲ្យបងប្អូនជីដូនមួយរបស់នាងមើលថែ។ ចំណែកប្ដីរបស់នាងវិញ ក៏ត្រូវបានប៉ូលិសចាប់ខ្លួនផងដែរ៕
សូមទស្សនារូបភាពនិងវីដេអូខាងក្រោម៖