ប៉ូឡូញ៖ ក្រុមអ្នកមុជទឹកកាលពីថ្ងៃចន្ទ បានចាប់ផ្ដើមប្រតិបត្តិការរយៈពេល៥ថ្ងៃ ដើម្បីដោះគ្រាប់បែកមិនទាន់ផ្ទុះដ៏ធំបំផុត ដែលមិនធ្លាប់មាននៅក្នុងប្រទេសប៉ូឡូញ ដោយបង្ខំឲ្យមនុស្សជាង៧៥០នាក់ ជម្លៀសចេញពីផ្ទះរបស់ពួកគេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកងទ័ពជើងទឹកបាននិយាយនៅលើគណនីហ្វេសប៊ុករបស់ខ្លួនថា គ្រាប់បែករញ្ជួយដី Tallboy ធ្លាប់ត្រូវបានប្រើដោយកងកម្លាំងទ័ពអាកាសអង់គ្លេស (RAF) និងមានទម្ងន់ជិត៥,៤០០គីឡូក្រាម រួមទាំងគ្រឿងផ្ទុះចំនួន២,៤០០គីឡូក្រាម។ គ្រាប់បែកនេះត្រូវបានគេរកឃើញនៅក្នុងប្រឡាយ Piast ហើយត្រូវបានទម្លាក់ដោយ RAF ក្នុងឆ្នាំ១៩៤៥ ក្នុងការវាយប្រហារទៅលើនាវាអាល្លឺម៉ង់ Lutzow។
ទីតាំងនេះស្ថិតនៅជិតទីប្រជុំជន Swinoujscie ភាគពាយព្យនៃប្រទេសប៉ូឡូញ ដែលជាកន្លែងស្ថានីយឧស្ម័នធម្មជាតិរាវ ត្រូវបានបើកនៅឆ្នាំ២០១៦។ អ្នកនាំពាក្យប្រតិបត្តិការនៅទីកន្លែងការដ្ឋាន Gaz-System បាននិយាយថា ពេលវេលានៃការដោះគ្រាប់បែកត្រូវបានព្រមព្រៀងគ្នារវាងក្រុមហ៊ុន កងទ័ពជើងទឹក និងអាជ្ញាធរមូលដ្ឋាន។
ប្រព័ន្ធផ្សព្វផ្សាយនៅក្នុងស្រុកបានរាយការណ៍ថា កាលពីថ្ងៃចន្ទ មនុស្ស៧៥១នាក់ត្រូវជម្លៀសចេញពីតំបន់នោះ។ ហើយកាលពីថ្ងៃអង្គារ គ្រាប់បែកក្នុងសម័យសង្គ្រាមលោកលើកទី២ដ៏ធំបំផុតមិនធ្លាប់មាន នៅក្នុងប្រទេសប៉ូឡូញ បានផ្ទុះឡើងនៅក្រោមទឹក ដោយសារតែអ្នកមុជទឹករបស់កងទ័ពជើងទឹកបានព្យាយាមដោះវាចេញ។ ជាសំណាងល្អ មិនមានអ្នករងគ្រោះធ្ងន់ធ្ងរ នៅក្នុងហេតុការណ៍នោះទេ៕