កម្រជួប! ក្រុមតារាវិទូថតបានទិដ្ឋភាព របស់ប្រហោងខ្មៅកំពុងលេបផ្កាយមួយដួង ទាញវែងដូចសរសៃមី

ឈីលី៖​ ប្រហោងខ្មៅមួយកំពុងតែរីករាយ ក្នុងការលេបយកសរសៃមីនៃផ្កាយមួយដួង សម្រាប់ជាអាហាររបស់វា ហើយព្រឹត្តិការណ៍នេះត្រូវបានប្រទះឃើញដោយក្រុមតារាវិទូ នៅរយៈចម្ងាយ២១៥លានឆ្នាំពន្លឺពីពួកយើង នៅក្នុងកាឡាក់ស៊ីគូថខ្យងក្នុងតារានិករ Eridanus។ ក្រុមតារាវិទូបានឃើញពន្លឺពីផ្កាយមួយ ដែលត្រូវបានលេបញែកចេញពីគ្នា ដោយប្រហោងខ្មៅដែលមានម៉ាស់យ៉ាងធំ ដោយប្រើតេឡេទស្សន៍ពីមន្ទីរអង្កេតតារាសាស្ត្រ European Southern Observatory ក្នុងប្រទេសឈីលី។

ថ្វីត្បិតតែស្ដាប់ទៅ វាហាក់ដូចជានៅសែនឆ្ងាយ តែព្រឹត្តិការណ៍នេះបានបង្ហាញពីការជិតបាត់បង់ជីវិតរបស់ផ្កាយមួយ ដែលអាចមើលឃើញក្នុងពេលបច្ចុប្បន្ន។ នៅពេលសរសៃដ៏វែងនៃផ្កាយត្រូវបានលេបចូលក្នុងប្រហោងខ្មៅ វានឹងបញ្ចេញពន្លឺដ៏ភ្លឺថ្លា ដែលអាចមើលឃើញដោយតារាវិទូ។

ព្រឹត្តិការណ៍សរសៃមីគឺជារឿងមួយដ៏កម្រ ដើម្បីធ្វើការសង្កេត និងពិបាកសិក្សា។ ប៉ុន្តែក្រុមអ្នកស្រាវជ្រាវបានប្រើប្រាស់តេឡេទស្សន៍យ៉ាងធំនិងបច្ចេកវិទ្យាថ្មីឲ្យត្រូវចំកន្លែង បន្ទាប់មកគេនឹងអាចតាមដានពន្លឺដែលនៅជិតមាត់ប្រហោងខ្មៅ។ ទោះបីពន្លឺពីផ្កាយបានបញ្ចេញយ៉ាងខ្លាំងក៏ដោយ ក៏វានៅតែពិបាកសម្រាប់តារាវិទូក្នុងការសិក្សា ព្រោះធូលីនិងកម្ទេចដែលបង្កើតនៅក្នុងព្រឹត្តិការណ៍នេះ ពិបាកក្នុងការពិនិត្យតាមដាន។

ថាមពលដែលត្រូវបានបញ្ចេញកំឡុងពេលការលេបយកដោយប្រហោងខ្មៅនេះ ពិតជាបានរុញកម្ទេចកម្ទីរបស់ផ្កាយជាប្រវែងវែង។ ក្រុមតារាវិទូបានចាប់ផ្ដើមសង្កេតព្រឹត្តិការណ៍នេះភ្លាមៗ បន្ទាប់ពីផ្កាយត្រូវបានទាញចេញ ហើយពួកគាត់ក៏បន្តប្រើតេឡេទស្សន៍និងឧបករណ៍ផ្សេងទៀត ដើម្បីសិក្សាលម្អិតពីវា ក្នុងរយៈពេល៦ខែ ចាប់តាំងពីពន្លឺពីផ្កាយនៅខ្លាំង រហូតដល់រលត់បាត់៕