ថាមែនៗ! យុវតីរូបនេះ សារភាពថានាងធ្លាប់វះកាត់កែសម្ផស្សជាង១០០ដងហើយ ទើបមើលទៅដូចតុក្កតាបែបនេះ

ចិន៖ សព្វថ្ងៃនេះ ប្រសិនបើកើតមកមិនសូវស្អាត មិនសូវទាក់ទាញ វាលែងជាបញ្ហាគួរឲ្យព្រួយបារម្ភ.តទៅទៀតហើយ ព្រោះបច្ចេកវិទ្យាកាន់តែទំនើប មនុស្សគ្រប់រូបសុទ្ធតែអាចធ្វើការកែសម្ផស្សតាមចិត្ដចង់បាន។ តួយ៉ាង យុវតីជនជាតិចិនវ័យ១៥ឆ្នាំម្នាក់ សារភាពថានាងបានវះកាត់កែសម្ផស្សលើស ១០០ដងហើយ ដើម្បីឲ្យមុខនាងមើលទៅដូចជាតុក្កតា ប៉ុន្ដែការលាតត្រដាងការពិតនេះ ធ្វើឲ្យអ្នកប្រើប្រាស់បណ្ដាញសង្គមរិះគន់បែកផ្សែងទៅវិញ។

យុវតី Little Z Nana គឺជា Influencer ម្នាក់ក្នុងប្រទេសចិន ដែលមានមុខមាត់គួរឲ្យស្រលាញ់ ប៉ុន្ដែនៅពីក្រោយភាពស្រស់ស្អាតនេះ នាងធ្លាប់ឆ្លងកាត់ការកែសម្ផស្សស្ទើរតែរាប់មិនអស់ទៅហើយ។ ជាក់ស្ដែង យុវតីរូបនេះបានសារភាពថា យ៉ាងហោចណាស់នាងធ្លាប់វះកាត់ត្របកភ្នែក៦ដង កន្ទុយភ្នែក៥ដង មាត់៣ដង ​បបូរមាត់២ដង និងទម្រង់ឆ្អឹងមុខម្ដង។ ហើយកាលនៅក្មេង នាងក៏ធ្លាប់វះកាត់សាច់ភ្លៅ២ដង និងខ្លាញ់ក្បាលពោះ៣ដងផងដែរ។

Nana បានឲ្យដឹងដែរថា នាងចាប់ផ្ដើមវះកាត់កែសម្ផស្ស តាំងពីអាយុ១៣ឆ្នាំមកម្ល៉េះ ហើយមកទល់ពេលនេះ នាងចំណាយអស់ប្រាក់ប្រហែល ១៥ម៉ឺនដុល្លារអាមេរិកហើយ។

ជុំវិញករណីនេះ គ្មាននរណាម្នាក់ដឹងច្បាស់ថា នាង Nana អាចធ្វើវាបានដោយវិធីណានោះទេ ទាំងដែលអាយុរបស់នាងនៅតិចបែបនេះ ក៏ប៉ុន្ដែវាប្រាកដជាការយល់ព្រមពីឪពុកម្ដាយរបស់នាងជាមិនខាន។ កត្ដានេះ បានធ្វើឲ្យអ្នកនិយមលេងអុីនធឺណេតផ្ទុះការរិះគន់មួយទំហឹង ចំពោះឪពុកម្ដាយរបស់នាង ដែលបណ្ដោយឲ្យកូនស្រីវ័យក្មេងវះកាត់ច្រើនដងដល់ថ្នាក់នេះ។ លើសពីនេះ ពួកគេរឹតតែផ្ទុះកំហឹងថែមទៀត បន្ទាប់ពីដឹងថា យុវតី Nana ឈប់រៀនដោយសារតែការវះកាត់ មិនអាចចេញទៅក្រៅច្រើន ហើយស្នាក់នៅតែក្នុងផ្ទះ៕

សូមទស្សនារូបភាពខាងក្រោម៖