បាងកក៖ ក្រុមអាជ្ញាធរថៃបានរាយការណ៍ថា មនុស្សយ៉ាងតិច ២០នាក់បានស្លាប់បាត់បង់ជីវិត និង ៣០នាក់បានរងរបួស នៅក្នុងគ្រោះថ្នាក់រថភ្លើងបុកជាមួយរថយន្តក្រុងដឹកអ្នកដំណើរ ៦០នាក់ នៅប្រទេសថៃកាលពីថ្ងៃអាទិត្យកន្លងនៅនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក Maitree Tritilanon អភិបាលខេត្ត Chachoengsao បាននិយាយថា ឧប្បត្តិហេតុនេះបានកើតឡើងនៅម៉ោង ៨:៥នាទីព្រឹក នៅជិតស្ថានីយរថភ្លើង Khlong Kwaeng Klan ដែលមានចម្ងាយ ៦៣គីឡូម៉ែត្រ ខាងកើតទីក្រុងបាងកក។
រូបភាពពីក្រុមអ្នកជួយសង្គ្រោះ បានបង្ហាញឱ្យឃើញពីរថយន្តក្រុងក្រឡាប់ទៅមួយចំហៀង ដោយមានទាំងសម្ភារៈផ្សេងៗ ក៏ដូចជាកម្ទេចកម្ទីដែក បានរាយប៉ាយនៅពាសពេញតំបន់គ្រោះថ្នាក់ ចំណែកឯរថភ្លើងគឺស្ថិតនៅលើផ្លូវដែកដដែល។
លោកអភិបាលខេត្ត Maitree បានលើកឡើងទៀតថា តំបន់ឆ្លងកាត់ផ្លូវរថភ្លើងនេះ មានសញ្ញាប្រកាសពីគ្រោះថ្នាក់ ប៉ុន្តែមិនមានរបាំងដាក់រារាំងការធ្វើដំណើរ នៅពេលរថភ្លើងបើកមកជិតដល់នោះទេ។ លោកបានបញ្ជាក់ថា ខេត្តនឹងរៀបចំដាក់របាំងការពារបន្ថែម ក៏ដូចជាកាត់ដើមឈើនៅក្បែរកន្លែងឆ្លងកាត់ ដើម្បីងាយស្រួលមើលរថភ្លើងឱ្យកាន់តែច្បាស់។
យោងតាមអង្គការសុខភាពពិភពលោកបានឱ្យដឹងថា ផ្លូវនៅក្នុងប្រទេសថៃ បានជាប់ចំណាត់ថ្នាក់ក្នុងចំណោមប្រទេស ដែលមានផ្លូវគ្រោះថ្នាក់បំផុតនៅលើពិភពលោក។ ហើយមានភាពប្រសើរឡើងតិចតួចប៉ុណ្ណោះ បើទោះបីជាមានយុទ្ធនាការសុវត្ថិភាព អស់រយៈពេលជាច្រើនឆ្នាំក៏ដោយ៕