ទឹកជំនន់​នៅវៀតណាម បានសម្លាប់មនុស្ស​អស់១៧នាក់

ហាណូយ៖ ប្រព័ន្ធផ្សព្វផ្សាយរដ្ឋវៀតណាមបាន​ឱ្យដឹងកាលពីថ្ងៃអាទិត្យថា មនុស្សយ៉ាងហោចណាស់​ ១៧នាក់ បានស្លាប់ដោយសារទឹកជំនន់នៅក្នុងខេត្តភាគកណ្តាលរបស់ប្រទេសវៀតណាមកាលពីសប្តាហ៍មុន ខណៈមនុស្សចំនួន ១៣នាក់ផ្សេងទៀត គឺកំពុងបាត់ខ្លួននៅឡើយ។

ទូរទស្សន៍រដ្ឋវៀតណាម VTV បានរាយការណ៍ទៀតថា នៅក្នុងរយៈពេលពីរបីថ្ងៃខាងមុខទៀតនេះ ប្រទេសវៀតណាម ក៏នឹងត្រូវទទួលរងការវាយប្រហារដោយ​ព្យុះ​មួយបន្ថែមទៀតឈ្មោះ លីនហ្វា (LINFA) ដែលនឹងនាំមកនូវភ្លៀងធ្លាក់ច្រើន និងបង្កជាទឹកជំនន់កាន់តែ​ខ្លាំង។

​ទឹកជំនន់នេះបានកាត់​ផ្តាច់ដំណើរការផ្គត់ផ្គង់ស្បៀងអាហារដល់ប្រជាជនរាប់ពាន់នាក់។ ហើយ​ប្រជាជនប្រមាណ ៣១,០០០នាក់ ត្រូវបានជម្លៀសចេញពីទីលំនៅ ចំណែកផ្ទះសម្បែងជាង ៣៣,០០០ខ្នង ត្រូវលិចលង់និងរងការខូចខាត​។ នេះបើ​តាមរបាយការណ៍របស់រដ្ឋាភិបាលវៀត​ណាម។

គួរជម្រាបដែរថា ​វៀតណាមគឺជាប្រទេស ដែលស្ថិតនៅតំបន់ងាយរងគ្រោះដោយសារខ្យល់ព្យុះ​និងទឹកជំនន់។ ហើយកាលពីឆ្នាំមុន គ្រោះមហន្តរាយធម្មជាតិ ទឹកជំនន់ និងការរអិលបាក់ស្រុតដី ដែលបង្កឡើងដោយសារព្យុះ បានសម្លាប់មនុស្ស ១៣២នាក់ និងរងរបួស ២០៧នាក់ នៅក្នុងប្រទេសមួយនេះ៕