គូនេះស្វិតស្វាញណាស់! អង់គ្លេសឡើងឈរកំពូលតារាងវិញក្រោយយកឈ្នះបែលហ្ស៊ិក ២-១ កាលពីយប់មិញ (មានវីដេអូ)

បរទេស៖ សម្រាប់ការប្រកួតទី៣នៃវគ្គចែកពូលពានរង្វាន់ UEFA Nations League 2020 យប់មិញនេះ ក្រុមជម្រើសជាតិអង់គ្លេសរកបាន៣ពិន្ទុបន្ថែម ក្រោយយកឈ្នះក្រុមជើងខ្លាំងបែលហ្ស៊ិក ដោយលទ្ធផលប្រកៀកប្រកិតគ្នា ២ទល់នឹង១។

បែលហ្ស៊ិកមានឱកាលនាំមុខមុនដោយការស៊ុតបាល់ប៉េណាល់របស់ខ្សែប្រយុទ្ធឆ្នើម Romelu Lukaku ក្រោយខ្សែការពារ Eric Dier របស់អង់គ្លេសធ្វើឲ្យរូបគេដួលក្នុងតំបន់គ្រោះថ្នាក់នៅនាទីទី១៦។ យ៉ាងណាមិញចូលដល់នាទីទី៣៩ អង់គ្លេសក៏មានសំណាងតាមបានមួយគ្រាប់មកវិញ ដោយបាល់ប៉េណាល់ទីដូចគ្នា ក្រោយខ្សែបម្រើ Thomas Meunier របស់បែលហ្ស៊ិកទាញ Jordan Henderson ឲ្យដួលក្នុងតំបន់គ្រោះថ្នាក់ ហើយអ្នកដែលរ៉ាប់រងគ្រាប់តាមស្មើនេះគឺខ្សែប្រយុទ្ធ Marcus Rashford ។ 

ចូលដល់តង់ទី២ពោលគឺនៅនាទីទី៦៤ ក្រុមជម្រើសជាតិអង់គ្លេសក៏អាចរកបានគ្រាប់ជ័យជម្នះរបស់ខ្លួនដោយកីឡាករ Mason Mount ស៊ុតទៅប៉ះនឹងជើងខ្សែការពារ  Toby Alderweireld កោងចូលទីដាច់ចង្កេះអ្នកចាំទី Simon Mignolet ។ 

គួរបញ្ជាក់ដែរថាមុនពេលដែល Lukaku រកបានគ្រាប់ទី១ឲ្យបែលស្សុិក ខ្សែប្រយុទ្ធ Yannick Carrasco ក៏មានឱកាសស៊ុតបានមួយគ្រាប់ផងដែរ ប៉ុន្តែត្រូវបានលោកអាជ្ញាកណ្តាលចាប់បាន Offside ។ ដោយឡែកយោងតាមលទ្ធផលនេះ អង់គ្លេសឡើងទៅឈរនៅលើកំពូលវិញមាន៧ពិន្ទុ ចំណែកបែលហ្ស៊ិកធ្លាក់មកឈរនៅលេខ២មាន៦ពិន្ទុ។ ហើយសម្រាប់ប្រកួតបន្ទាប់ អង់គ្លេសនឹងត្រូវប៉ះជាមួយដាណឺម៉ាក រីឯបែលហ្ស៊ិកនឹងត្រូវប៉ះជាមួយអ៊ីស្លង់៕

ប្រភព៖ bbc