កូនខ្លាឃ្មុំដែលត្រូវមេរត់ចោល បានក្លាយទៅជាតារាម៉ូដែល បន្ទាប់ពីរស់នៅជាមួយមនុស្សច្រើនឆ្នាំ

រុស្សុី៖​ ខ្លាឃ្មុំឈ្មោលពណ៌ត្នោតមួយក្បាល ឈ្មោះថា ស្ដេបផេន វ័យ២៨ឆ្នាំ ដែលត្រូវបានមេរបស់វាបោះបង់ចោល បានក្លាយទៅជាតារាម៉ូដែល បន្ទាប់ពីវាត្រូវបានមើលថែ និងរស់នៅជាមួយមនុស្សអស់រយៈពេលជាច្រើនឆ្នាំ។

អ្នកស្រី មីឡាហ្សា ដាណូវ៉ា វ័យ៤០ឆ្នាំ មកពីទីក្រុង Moscow បានជួបខ្លាឃ្មុំស្ដេបផេន ជាលើកដំបូងតាមរយៈមិត្តភាពរបស់អ្នកស្រីជាមួយម្ចាស់ខ្លាឃ្មុំ ឈ្មោះ ស្វេតឡាណា និង យូរី។

ដោយសង្កេតឃើញថា ខ្លាឃ្មុំមួយក្បាលនេះ មានភាពស្និទ្ធស្នាលជាមួយនឹងមនុស្សជុំវិញខ្លួនរបស់វា អ្នកស្រី មីឡា ក៏មានគំនិតរៀបចំបង្កើតនូវឈុតឆាកថតរូបបែប.រវើរវាយ ដែលបង្ហាញដោយខ្លាឃ្មុំនេះ រួមជាមួយនឹងមនុស្សក្នុងសម្លៀកបំពាក់ប្រពៃណីរបស់ប្រទេសរុស្សុីតែម្ដង។

យោងតាមសម្ដីរបស់អ្នកស្រី មីឡា បានឲ្យដឹងថា អ្នកស្រីពិតជាអរគុណដល់អ្នកបង្វឹកខ្លាឃ្មុំស្ដេបផេន ចំពោះការយកចិត្តទុកដាក់ ដែលធ្វើឲ្យវាមានភាពរាក់ទាក់ជាមួយមនុស្ស។ អ្នកស្រីបានរួមការងារជាមួយនឹងតារាម៉ូដែល ដែលមកពីប្រទេសថៃ អូស្ត្រាលី អាល្លឺម៉ង់ អង់គ្លេស និងអុីស្រាអែល ហើយពួកគេសុទ្ធសឹងតែរីករាយក្នុងការធ្វើការជាមួយខ្លាឃ្មុំស្ដេបផេន។

យ៉ាងណាមិញ ជុំវិញនៃការថតរូបខាងលើនេះ ត្រូវបានធ្វើឡើងក្នុងរយៈពេលជាច្រើនខែឯណោះក្នុងទីក្រុង Moscow ដោយសារតែខ្លាឃ្មុំស្ដេបផេនអាចធ្វើការក្នុងមួយដងបានប្រហែលកន្លះម៉ោងប៉ុណ្ណោះ។ ហើយអ្នកស្រី មីឡាក៏សង្ឃឹមដែរថា អ្នកដែលបានឃើញរូបថតទាំងអស់ នឹងអាចឃើញពីសម្រស់ និងកម្លាំងនៅក្នុងខ្លួនសត្វ បូករួមទាំងធម្មជាតិផងដែរ៕

សូមទស្សនារូបភាពខាងក្រោម៖