ហ្វាំងឡង់៖ យុវតីវ័យ១៦ឆ្នាំម្នាក់ឈ្មោះ Aava Murto បានចូលកាន់តំណែងជានាយករដ្ឋមន្ដ្រីនៃប្រទេសហ្វាំងឡង់រយៈពេលមួយថ្ងៃ ជំនួសលោកស្រី Sanna Marin សម្រាប់កម្មវិធី «Girls Takeover» របស់អង្គការ Plan International កាលពីថ្ងៃពុធ ទី០៧ ខែតុលា ឆ្នាំ២០២០ កន្លងទៅ។ នេះបើតាមការដកស្រង់ពីសារព័ត៌មាន BBC ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការផ្ទេរតំណែងរយៈពេលមួយថ្ងៃនេះ បានធ្វើឡើងនៅមុនថ្ងៃនៃទិវាកុមារីរបស់អង្គសហប្រជាជាតិ និងជាផ្នែកមួយនៃយុទ្ធនាការជាសកលដោយអង្គការសប្បុរសធម៌កុមារ។ ក្នុងរយៈពេលពេញមួយថ្ងៃនោះដែរ យុវតី Murto ប្រហែលមិនបានបង្កើតច្បាប់ថ្មីនោះទេ ប៉ុន្ដែនាងបានជួបជាមួយអ្នកនយោបាយ ដើម្បីបង្ហាញពីសិទ្ធិរបស់ស្ដ្រីនៅក្នុងវិស័យបច្ចេកវិទ្យា។
គួរឲ្យដឹងថា វាជាឆ្នាំទី៤ហើយដែលប្រទេសហ្វាំងឡង់បានចូលរួមក្នុងកម្មវិធីនេះ ដែលអនុញ្ញាតឲ្យក្មេងជំទង់មកពីប្រទេសនានាជុំវិញពិភពលោក អាចឈានជើងចូលកាន់ដំណែងជាអ្នកដឹកនាំក្នុងវិស័យនយោបាយ និងវិស័យផ្សេងៗទៀត រយៈពេលមួយថ្ងៃ។
តួយ៉ាង កម្មវិធីឆ្នាំនេះគឺផ្ដោតសំខាន់លើការលើកកម្ពស់ជំនាញឌីជីថល និងឳកាសសម្រាប់ក្មេងស្រីក្នុងវិស័យបច្ចេកវិទ្យា។ ក្នុងនោះ ប្រទេសកេនយ៉ា ប៉េរូ ស៊ូដង់ និងវៀតណាម ក៏ស្ថិតក្នុងចំណោមបណ្តាប្រទេសដែលប្រគល់តំណែងឱ្យក្មេងស្រីកាន់កាប់មួយថ្ងៃផងដែរ៕