កម្មករស៊ីនទ្រីប្រមាណ ៣០០នាក់ ក្នុងចំណោមអ្នកកំពុងធ្វើកូដកម្មជាង ២០០០នាក់ បានវិលត្រឡប់ចូលបំរើការងារវិញ។ នេះជាការផ្សាយពីលោក ម៉េត មាសភក្តី អ្នកនាំពាក្យសាលារាជធានីភ្នំពេញនៅព្រឹកថ្ងៃ ១០ តុលានេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក ភក្តី បានបង្ហោះនៅលើទំព័រហ្វេសប៊ុកផ្ទាល់ខ្លួនថា៖ «ព្រឹកនេះមានដំណឹងល្អ ដោយបងប្អូនកម្មករក្រុមហ៊ុន ស៊ីនទ្រី ប្រមាណជា ៣០០នាក់ ក្នុងចំណោមអ្នកកំពុងធ្វើកូដកម្ម បានភ្ញាក់រលឹក វិលត្រឡប់ចូលបំរើការងារវិញ។ សង្ឃឹមថា អ្នកនៅកំពុងពិចារណា សូមឆាប់សម្រេចចិត្តដូចអ្នកដទៃ រួចចូលមកចាប់ដៃគ្នាសំអាតភ្នំពេញរបស់យើង»។
សូមបញ្ជាក់ថា ជាងមួយសប្តាហ៍កន្លងមកនេះ កម្មករប្រមូលសំរាមរបស់ក្រុមហ៊ុនស៊ិនទ្រីជាង ២០០០នាក់ បានមូលមតិគ្នាធ្វើកូដកម្ម ដោយមិនព្រមចេញប្រមូលសំរាមដូចមុនឡើយ។ ការធ្វើកូដកម្មបែបនេះ ដោយពួកគាត់ទាមទារឲ្យក្រុមហ៊ុនដោះស្រាយជូននូវប្រាក់បំណាច់អតីតភាពកាងារ ប្រាក់ខែចុងក្រោយ ការឈប់សម្រាកប្រចាំឆ្នាំដែលនៅសេសសល់ និងលក្ខខណ្ឌខ្លះៗទៀត។
ជាការកត់សម្គាល់ តាមរយៈបទសម្ភាសជាមួយខ្មែរឡូតកាលពីថ្ងៃ ០៩តុលាម្សិលមិញ លោក ម៉េត មាសភក្តី បកស្រាយថា ការសុំបើកនូវប្រាក់អត្ថប្រយោជន៍នានារបស់កម្មករយ៉ាងដូច្នេះគឺមិនខុសទេ តែមិនស្របតាមច្បាប់ការងារ។ យ៉ាងណាមកទល់ព្រឹកថ្ងៃ ១០តុលានេះ ទើបមន្ត្រីខាងលើបញ្ជាក់ថា កម្មករស៊ីនទ្រី ប្រមាណ ៣០០នាក់ ក្នុងចំណោមអ្នកកំពុងធ្វើកូដកម្មជាង ២០០០នាក់ បានវិលត្រឡប់ចូលបំរើការងារវិញហើយ៕