យុវជន​​ថៃ​​មួយក្រុមបង្កើត​កម្មវិធីលើ​ប្រធាន​​បទ «សុវត្ថិភាព​សម្រាប់​អ្នក​ប្រយុទ្ធ ​Muay ​Thai ​វ័យ​ក្មេង​»

ថៃ៖ ក្រុមការងារនៅកម្មវិធី WBC Muay Thai Youth Cares ដែលដឹកនាំដោយប្រធានស្រី Jade Bhakdibhumi បានធ្វើសិក្ខាសាលាមួយដែលផ្តោតលើសុវត្ថិភាពរបស់យុវជនក្នុងការប្រកួត Muay Thai ដែលធ្វើឡើង​នៅឯក្លឹបហាត់ប្រាណ Khongsitta ទីក្រុងបាងកកកាលពីចុងសប្តាហ៍។

សិក្ខាសាលានេះបានផ្តល់ឱ្យអ្នកហាត់កីឡា Muay Thai វ័យក្មេងនូវឱកាសមួយដើម្បីយល់ថាពួកគេអាចរងរបួស​ប្រសិនបើពួកគេមិនប្រើឧបករណ៍ការពារដូចជាទ្រនាប់ការពារក្បាល ស្មងជើង និងទ្រនាប់កែង។

ព្រឹត្តិការណ៍នេះត្រូវបានរៀបចំឡើងដោយលោក Matthew Deane ដែលជាម្ចាស់ក្លឹបហាត់ប្រាណ Khongsitta និងជាឯកអគ្គរដ្ឋទូតសម្រាប់កម្មវិធី WBC Muay Thai Youth Cares ផងដែរ។

តារា Muay Thai ដ៏ល្បីល្បាញគឺកីឡាការនី ViVi MuayDed789 និង Nongkampan ក្នុងចំណោមអ្នកដទៃ​ទៀតបានរួមគ្នាធ្វើសិក្ខាសាលានេះ។

កីឡាករ Yodwicha Banchamek ម្ចាស់ជើងឯកទម្ងន់ធ្ងន់-ទម្ងន់មធ្យមពិភពលោកគឺជាភ្ញៀវពិសេសផងដែរ។

ម្ចាស់ជើងឯករូបនេះបានបង្រៀនបច្ចេកទេសដល់អ្នកចូលរួម និងត្រួតពិនិត្យការហ្វឹកហាត់ការ​ប្រយុទ្ធរវាងអ្នក​ប្រយុទ្ធវ័យក្មេង។

វាគ្មិនសំខាន់ៗគឺលោកវេជ្ជបណ្ឌិត Sitha Phongphibool ប្រធានក្រុមប្រឹក្សាពិគ្រោះយោបល់ផ្នែកវេជ្ជសាស្រ្តរបស់ WBC Muay Thai ។

លោកវេជ្ជបណ្ឌិត Sitha បានថ្លែងសុន្ទរកថាស៊ីជម្រៅអំពីហានិភ័យនៃការមិនពាក់ឧបករណ៍ការពារ​នៅពេលចូលរួម​ក្នុងកីឡាប្រយុទ្ធនៅវ័យក្មេង។ លោកក៏បានសង្កត់ធ្ងន់ពីសារសំខាន់នៃការពាក់ឧបករណ៍ការពារក្នុង​កំឡុងពេលហ្វឹក​ហាត់ផងដែរ។

គួររំលឹកផងដែរថា សិក្ខាសាលានេះបានធ្វើឱ្យអ្នកចូលរួមយល់ដឹងអំពីការរងរបួសធ្ងន់ធ្ងរដែលពួកគេអាច​នឹងប្រឈម​ប្រសិនបើពួកគេធ្វើការប្រយុទ្ធ ឬហ្វឹកហាត់ដោយមិនប្រើប្រាស់ឧបករណ៍ការពារត្រឹមត្រូវ។