រហូតមកដល់ព្រឹកថ្ងៃទី០៨ ខែតុលា ឆ្នាំ២០២០នេះ កម្មករក្រុមហ៊ុន ស៊ិនទ្រី បន្ដមិនចេញប្រមូលសំរាមតាមការព្រមព្រៀងក្នុងកិច្ចប្រជុំរកដំណោះស្រាយកាលពីថ្ងៃម្សិលមិញឡើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សរដ្ឋបាលរាជធានីភ្នំពេញអះអាងថា ខ្លួនមានការសោកស្ដាយយ៉ាងខ្លាំងចំពោះទង្វើរបស់កម្មករនិយោជិតរបស់ ក្រុមហ៊ុន ស៊ិនទ្រី មួយចំនួនដែលមិនបានគោរពតាមការព្រមព្រៀងក្នុងអង្គប្រជុំ ដែលបានធ្វើឡើងនៅថ្ងៃទី០៧ ខែតុលា ឆ្នាំ២០២០ម្សិលមិញ ខណៈមានកាចូលរួមពី លោក ឃួង ស្រេង អភិបាលរាជធានីភ្នំពេញ។
គួរបញ្ជាក់ថា ក្នុងអង្គប្រជុំរកដំណោះស្រាយ គ្រប់ភាគីទាំងអស់ ពិសេសកម្មករក្រុមហ៊ុន ស៊ិនទ្រី បានព្រមព្រៀងដូចខាងក្រោម៖
១៖ ចំពោះសំណើរបស់កម្មករនិយោជិតទាមទារឲ្យក្រុមហ៊ុនដោះស្រាយពេលបញ្ចប់កិច្ចសន្យា ក្រុមហ៊ុនទទួលដោះស្រាយតាមច្បាប់ស្ដីពីការងារ ហើយរដ្ឋបាលរាជធានីភ្នំពេញ ជាអ្នកធានាខុសត្រូវ។
២៖ ចំពោះការងាររបស់កម្មករនិយោជិត ទៅថ្ងៃខាងមុខរដ្ឋបាលរាជធានីភ្នំពេញធានាមិនឲ្យបាត់បង់ឡើយ ទោះបីក្រុមហ៊ុនស៊ិនទ្រី ដេញថ្លៃជាប់ ឬមិនជាប់ក៏ដោយ
៣៖ សូមឲ្យកម្មករនិយោជិតទាំងអស់នាំគ្នាចូលធ្វើការងារជាធម្មតាវិញ ចាប់ពីរសៀលថ្ងៃទី០៧ ខែតុលា ឆ្នាំ២០២០នេះតទៅ។
រដ្ឋបាលរាជធានីភ្នំពេញថា យ៉ាងណានៅល្ងាចថ្ងៃទី០៧ ខែតុលា ដដែលកម្មករនិយោជិតដែលជាអ្នកបើកបរ បានកែប្រែចិត្តមិនព្រមចេញឡានទៅប្រមូលសំរាម តាមការព្រមព្រៀងនោះឡើយ។
សូមរំឭកថា តាំងពីល្ងាចថ្ងៃទី ០២ ដល់ព្រឹកថ្ងៃ ០៧តុលា កម្មករប្រមូលសំរាមរបស់ក្រុមហ៊ុនស៊ិនទ្រី បានធ្វើកូដកម្ម ដោយមិនចេញប្រមូលសំរាម ដែលធ្វើឲ្យមានសំរាមកកស្ទះនៅតាមដងផ្លូវនានាក្នុងរាជធានីភ្នំពេញ។ ការធ្វើកូដកម្មនេះ កម្មករបានទាមទារឲ្យក្រុមហ៊ុន ស៊ិនទ្រី ដោះស្រាយនូវ៖ «ប្រាក់បំណាច់អតីតភាពកាងារ ប្រាក់សំណងជំងឺចិត្ត ប្រាក់ជួសការជូនដំណឹងមុន ប្រាក់ខែចុងក្រោយ ការឈប់សម្រាកប្រចាំឆ្នាំដែលនៅសេសសល់»។
ក្រោយពីមានការសម្របសម្រួលកាលពីថ្ងៃ ០៧ តុលា កម្មករបានស្ម័គ្រចិត្តឈប់ធ្វើបាតុកម្ម ដោយសន្យាថានឹងចូលបម្រើការងារវិញនៅរសៀលថ្ងៃទី ០៧ តុលានេះ។ យ៉ាងណាមន្ត្រីថា រហូតមកដល់ព្រឹកថ្ងៃទី០៨ ខែតុលា ឆ្នាំ២០២០នេះ កម្មករក្រុមហ៊ុន ស៊ិនទ្រី បន្ដមិនចេញប្រមូលសំរាមតាមការព្រមព្រៀងឡើយ៕