ក្នុងជំនួបដណ្តើមពានរង្វាន់បើករដូវកាលរបស់អង់គ្លេស FA Community Shield រវាងក្លឹប Liverpool ជាមួយនឹងក្លឹប Manchester City កាលពីថ្ងៃទី៤ ខែសីហា ឆ្នាំ២០១៩ ជាជំនួបដែលមានតម្លៃខ្លួនកីឡាករបញ្ជូលគ្នាច្រើនបំផុតក្នុងប្រវត្តិសាស្ត្របាល់ទាត់ គឺមានតម្លៃរហូតដល់ទៅប្រមាណ ១.៧៧ពាន់លានផោន (គិតលើតម្លៃខ្លួនកីឡាករដែលបានចូលលេង) ខណៈជំនួបដែលស្ថិតនៅលេខរៀងទី២ គឺរវាងក្លឹប Real Madrid (៧៥១លានផោន) និងក្លឹប Barcelona (៩៧៨លានផោន) ក្នុងសប្តាហ៍ទី២៦ នៃក្របខណ្ឌ La Liga កាលពីថ្ងៃទី២ ខែមិនា ឆ្នាំ២០១៩ មានតម្លៃប្រមាណ ១.៧៣ពាន់លានផោន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងជំនួបគូប្រជែងរួមលីគកំពូលអង់គ្លេសនេះ មានអ្នកចូលរួមទស្សនាក្នុងកីឡដ្ឋានជាតិអង់គ្លេស Wembley Stadium ចំនួន ៧៧,៥៦៥នាក់ បានអូសបន្លាយរហូតដល់ការទាត់បាល់ ១១ម៉ែត្រកាត់សេចក្តី (ក្រោយបញ្ចប់លទ្ធផល ១ទល់នឹង១) ដោយក្លឹប Manchester City បានយកឈ្នះក្លឹប Liverpool ក្នុងលទ្ធផលសរុប ៦ ទល់នឹង ៥។
នេះជាការប្រកួតមួយដែលត្រូវបានកត់ត្រាក្នុងប្រវត្តិសាស្ត្រដែលក្លឹបទាំង២ បានចម្រាញ់ដាក់ឱ្យកីឡាករកំពូលៗរបស់ខ្លួនចូលលេង និងបំបែកកំណត់ត្រាជាជំនួបដែលកីឡាករមានតម្លៃខ្លួនសរុបច្រើនជាងគេបំផុតក្នុងពិភពលោក ខណៈកីឡាករក្លឹប Liverpool មានតម្លៃខ្លួនកីឡាករសរុប ៨៩៥លានផោន ចំណែកក្លឹប Manchester City មានតម្លៃខ្លួនកីឡាករសរុប ៨៧២.៥លានផោន៕
ប្រភព៖ transfermarkt