កម្មករប្រមូលសំរាមរបស់ក្រុមហ៊ុនស៊ីនទ្រីចំនួនជាង ២០០០នាក់ ដែលធ្វើកូដកម្មតវ៉ាមិនព្រមដឹកជញ្ជូនសំរាមទៅកាន់ទីលានចាក់សំរាមអស់រយៈពេល ៥ ថ្ងៃកន្លងមកនេះ បានស្ម័គ្រចិត្តឈប់ធ្វើបាតុកម្ម ដោយសន្យាថានឹងចូលបម្រើការងារវិញនៅរសៀលថ្ងៃទី ០៧ តុលានេះ។ នេះបើតាមការផ្សាយជាផ្លូវការពីទូរទស្សន៍ជាតិកម្ពុជា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការឯកភាព និងបញ្ឈប់នូវរាល់ការធ្វើបាតុកម្មខាងលើនេះបានធ្វើឡើងក្រោយឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ចុះទៅដោះស្រាយផ្ទាល់ដល់ទីតាំងកូដកម្មនាព្រឹកថ្ងៃទី០៧ តុលានេះ ដោយបានស្នើសុំឱ្យកម្មករប្រមូលសំរាមទាំងអស់ចូលបម្រើការងារវិញ នារសៀលថ្ងៃទី ០៧ តុលានេះ ។ ជាការឆ្លើយតប កម្មករបានយល់ព្រមចូលបម្រើការងារវិញទៅតាមការស្នើសុំ។
គួររំឭកថា តាំងពីល្ងាចថ្ងៃទី ០២ ដល់ព្រឹកថ្ងៃ ០៧តុលានេះ កម្មករប្រមូលសំរាមរបស់ក្រុមហ៊ុនស៊ិនទ្រី បានធ្វើកូដកម្ម ដោយមិនចេញប្រមូលសំរាម ដែលធ្វើឲ្យមានសំរាមកកស្ទះនៅតាមដងផ្លូវនានាក្នុងរាជធានីភ្នំពេញ។ ការធ្វើកូដកម្មនេះ កម្មករបានទាមទារឲ្យក្រុមហ៊ុន ស៊ិនទ្រី ដោះស្រាយនូវ៖ «ប្រាក់បំណាច់អតីតភាពកាងារ ប្រាក់សំណងជំងឺចិត្ត ប្រាក់ជួសការជូនដំណឹងមុន ប្រាក់ខែចុងក្រោយ ការឈប់សម្រាកប្រចាំឆ្នាំដែលនៅសេសសល់»។ យ៉ាងណា មន្ត្រីសាលារាជធានីភ្នំពេញលើកឡើងថា កម្មករប្រមូលសម្រាមទាំងនោះកំពុងទាមទារនូវលក្ខខណ្ឌមិនសមស្របមួយចំនួន។ ជាការកត់សម្គាល់ ក្រោយមកកម្មករបានយល់ព្រមចូលបម្រើការងារវិញហើយនៅរសៀលថ្ងៃ ០៧ តុលានេះ៕