ថៃ​រកឃើញអ្នកឆ្លងជំងឺកូវីដ១៩ថ្មីចំនួន ​១៥នាក់

បាងកក៖ ប្រទេសថៃ​បានប្រកាសរកឃើញ​អ្នកឆ្លង​កូវីដ១៩ថ្មីចំនួន​ ​១៥នាក់​បន្ថែមទៀត ដែល​ធ្វើឱ្យតួលេខអ្នកឆ្លងសរុបបានកើនឡើងដល់ ​៣,៦១៥នាក់។ នេះបើ​យោងតាមទីភ្នាក់ងារព័ត៌មាន ​Bangkok Post ចេញផ្សាយនៅថ្ងៃពុធ ​ទី៧ ខែតុលា ឆ្នាំ២០២០។

មជ្ឈមណ្ឌលរដ្ឋបាលស្តីពីស្ថានភាពជំងឺកូវីដ១៩​ក្នុងប្រទេសថៃបានឱ្យដឹងថា អ្នកជំងឺកូវីដ១៩ថ្មីនេះគឺជាអ្នកដំណើរមកពីក្រៅប្រទេស ដោយក្នុងនោះរួមមាន អ្នកដំណើរមកពីប្រទេសបង់ក្លាដែស២ករណី ហុងកុង១ករណី ឥណ្ឌា២ករណី មីយ៉ាន់ម៉ា១ករណី ស៊ូដង់​ខាងត្បូង៦ករណី និងសហរដ្ឋអាមេរិកចំនួន៣ករណី។

​គួរ​​​ជម្រាបផងដែរថា ​បើគិតមកត្រឹមថ្ងៃនេះ ​ប្រទេសថៃមានអ្នកស្លាប់ដោយជំងឺកូវីដ១៩ចំនួន ៥៩នាក់ អ្នកជាសះស្បើយ​ ៣,៣៩១នាក់ ខណៈអ្នកជំងឺចំនួន ១៦៥នាក់ទៀត គឺកំពុងសម្រាកព្យាបាលនៅមន្ទីរពេទ្យ៕