ស៊យហ្មង! ក្មេងស្រីម្នាក់ ត្រូវម្ជុលចាក់បបូរមាត់ បន្ទាប់ពីញាំផ្លែស្ត្របឺរីដែលទិញពីផ្សារទំនើប

អូស្ដ្រាលី៖ ក្មេងស្រីអាយុ៦ឆ្នាំម្នាក់ឈ្មោះ Madison Mitchell រស់នៅភាគខាងជើងរដ្ឋ Queensland ប្រទេសអូស្ដ្រាលី ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ បន្ទាប់ពីនាងបានញាំផ្លែស្ត្របឺរីដែលបង្កប់ម្ជុលនៅខាងក្នុង បណ្ដាលឲ្យមុតបបូរមាត់។

ហេតុការណ៍នេះ បានកើតឡើងកាលពីល្ងាចថ្ងៃចន្ទ ទី០៥ ខែតុលា ពេលដែលកុមារី Madison ញាំផ្លែស្ត្របឺរី ដែលគ្រួសាររបស់នាងបានទិញមកពីផ្សារទំនើប Coles ស្ថិតក្នុងតំបន់ Earlville ជាយក្រុង Cairns។ ជុំវិញករណីនេះដែរ អ្នកស្រី Sophie ត្រូវជាម្ដាយបានរៀបរាប់ថា បន្ទាប់ពី Madison ដាក់ផ្លែស្ត្របឺរីចូលក្នុងមាត់ ហើយមានអារម្មណ៍ឈឺចាប់ ភ្លាមៗនោះ អ្នកស្រីបានយកវាចេញពីក្នុងមាត់របស់នាង ក៏ស្រាប់តែប្រទះឃើញមានម្ជុលនៅក្នុងផ្លែស្ត្របឺរី។ ដូច្នេះ គាត់ក៏ប្រញាប់ប្រញាល់បញ្ជូនកូនស្រីទៅសង្គ្រោះនៅមន្ទីរពេទ្យតែម្ដង។

អ្នកស្រីបាននិយាយទៀតថា ប្រសិនបើកូនប្រុសអាយុ៣ឆ្នាំរបស់គាត់ បានទទួលផ្លែស្ត្របឺរីនោះមុន ប្រហែលជាគេនឹងលេបវាទាំងអស់បាត់ហើយ តែនេះសំណាងណាស់ ដែល Madison នាងមករកគាត់មុន ហើយគាត់ក៏ហុចផ្លែស្ត្របឺរីដែលមានម្ជុលទៅឲ្យ។ តែទោះជាយ៉ាងណា គ្រូពេទ្យគិតថា វានៅតែជាសំណាងអាក្រក់ ពីព្រោះ Madison អាចឆ្លងមេរោគពីម្ជុលនោះផងដែរ។

យ៉ាងណាមិញ អ្នកនាំពាក្យផ្សារទំនើបម្នាក់ បានប្រាប់ប្រព័ន្ធផ្សព្វផ្សាយថា  ខាងផ្សារទំនើបព្រួយបារម្ភណាស់ពេលដឹងរឿងនេះ  ហើយពួកគេនឹងតាមដានអតិថិជន ដើម្បីប្រាកដថាកុមារី Madison និងគ្រួសាររបស់នាងមិនមានបញ្ហាអ្វីឡើយ៕

សូមទស្សនារូបភាពខាងក្រោម៖