WHO៖ វ៉ាក់សាំងកូវីដ១៩ អាចនឹងត្រៀមរួចរាល់នៅដំណាច់ឆ្នាំនេះ

ហ្សឺណែវ៖ ប្រធានអង្គការសុខភាពពិភពលោក លោក Tedros Adhanom Ghebreyesus បាននិយាយ​កាលពីថ្ងៃអង្គារសប្តាហ៍នេះថា វ៉ាក់សាំងប្រឆាំងនឹង​ជំងឺកូវីដ១៩ អាចនឹងត្រៀមរួចរាល់នៅដំណាច់ឆ្នាំនេះ។ ​ស្របពេលជាមួយគ្នានេះដែរ លោកក៏បានអំពាវនាវឱ្យមេដឹកនាំទាំងអស់ ត្រូវមានសាមគ្គីភាព​គ្នា ក៏ដូចជាការប្តេជ្ញាចិត្តផ្នែកនយោបាយ ​ ដើម្បីធានាឱ្យមាន​សមភាពលើដំណើរការចែកវ៉ាក់សាំង នៅពេលដែលវាត្រូវបានផលិត​រួចរាល់។

​បច្ចុប្បន្នមានវ៉ាក់សាំងចំនួន៩ប្រភេទ ដែលកំពុងឆ្លងកាត់ដំណើរការពិសោធន៍​ ដោយស្ថិតនៅក្រោមយន្តការ COVAX របស់អង្គការសុខភាពពិភពលោក ហើយវាត្រូវបានធ្វើឡើងក្នុងគោលបំណងចែកចាយជាលក្ខណៈសកលឱ្យបានចំនួន ២ពាន់លានដូស នៅចុងឆ្នាំ ២០២១៕

គួរ​ឱ្យដឹងដែរថា រហូតមកដល់ពេលនេះ ជំងឺកាចសាហាវកូវីដ១៩ បានឆក់យកជីវិតមនុស្សនៅទូទាំងពិភពលោកជាង ១លាននាក់ ក្នុងចំណោមអ្នកឆ្លងសរុបជាង ៣៦លាននាក់ ចំណែកមនុស្សប្រមាណ ២៧លាននាក់ផ្សេងទៀត បានជាសះស្បើយ៕