ទោះមានវ័យ៣៣ឆ្នាំ តែ Cavani មាន៣ចំណុចសំខាន់ៗនេះសម្រាប់ Man United

មានរឿងជាច្រើនដែលក្លិប Manchester United រំពឹងពីខ្សែប្រយុទ្ធជើងចាស់ Edinson Cavani ដែលសង្ឃឹមថាអាចនឹងនាំភាពជោគជ័យដល់ក្លិប អ្នកគាំទ្រ ក៏ដូចជារូបគាត់ផ្ទាល់ផងដែរ។

៣ចំណុចសំខាន់ៗខាងក្រោមនេះជាហេតុផលដែល Man United ចុះកិច្ចសន្យាយក Edinson Cavani៖

១. គ្រាប់បាល់ដែល Cavani រកបាន៖ 

រដូវកាល ២០១៩-២០២០ របស់ Cavani នៅ Paris Saint-Germain គឺជារឿងដែលមិនអាចភ្លេចបាននោះទេ ដោយកំណត់ត្រារបស់ខ្សែប្រយុទ្ធរូបនេះរកបានដល់ទៅ ៣៥៣ គ្រាប់ក្នុង ៥៨៦ ប្រកួតគឺនៅតែដាច់ឆ្ងាយជាងអ្វីដែលខ្សែប្រយុទ្ធក្រុមបិសាចក្រហម Manchester United អាចធ្វើបាន។ កីឡាករសញ្ជាតិអ៊ុយរូហ្គាយរូបនេះក៏ជាអ្នកស៊ុតបាល់បញ្ចូលទីបំបែកបានកំណត់ត្រានៅ PSG ផងដែរ ដោយស៊ុតបញ្ចូលទីបានរហូតដល់់់ទៅ ២០០ គ្រាប់ គិតចាប់ពីគាត់បានមកលេងក្នុងកំឡុងពេល ៧ ឆ្នាំនេះ។

២. បទពិសោធន៍អាជីពបាល់ទាត់របស់ Cavani៖

នៅវ័យ ៣៣ ឆ្នាំ ខ្សែប្រយុទ្ធ Cavani នឹងមានអ្វីជាច្រើនក្នុងការបង្រៀនខ្សែប្រយុទ្ធវ័យក្មេងរបស់ Man United ។ Anthony Martial (២៤ឆ្នាំ), Marcus Rashford (២២ឆ្នាំ), Daniel James (២២ឆ្នាំ) និង Mason Greenwood (១៩ឆ្នាំ) គួរតែឆ្លៀតយកឱកាសនេះដើម្បីសិក្សាពីខ្សែប្រយុទ្ធរៀមច្បងរូបនេះ និងរៀនឱ្យបានកាន់តែច្រើនតាមដែលអាចធ្វើទៅបានពីកីឡាករអន្តរជាតិសញ្ជាតិអ៊ុយរូហ្គាយរូបនេះ។

៣. ឆន្ទៈមុះមុត៖ 

លោក Ole Gunnar Solskjaer ធ្លាប់មានបំណងចង់បានខ្សែប្រយុទ្ធដែលមានឆន្ទៈចង់បំបែកកំណត់ត្រាក្នុងការរកគ្រាប់បាល់បញ្ចូលទី ហើយឥឡូវគ្រូបង្វឹកសញ្ជាតិន័រវែសរូបនេះរកបានហើយគឺកីឡាករ Cavani នេះហើយ។ ខ្សែប្រយុទ្ធជើងចាស់រូបនេះមិនដែលឈប់ហ្វឹកហាត់នោះទេ ដូចដែលបានបង្ហាញឱ្យឃើញដោយសមត្ថភាពរបស់គាត់ក្នុងការកាន់កាប់តំបន់ប្រយុទ្ធដែលអាចប្រជែងជាមួយ Neymar និង Kylian Mbappe បាននៅ PSG ៕

ប្រភព៖ Tribuna