កាន់តែធ្ងន់ធ្ងរ! សូម្បីតែប្រធានគណៈកម្មការអឺរ៉ុបក៏កំពុងធ្វើចត្តាឡីស័កខ្លួនឯងដែរ

សហភាពអ៊ឺរ៉ុប៖ ប្រធានគណៈកម្មាធិការអឺរ៉ុបគឺលោកស្រី Ursula von der Leyen បានប្រកាសនៅលើបណ្តាញសង្គម Twitter ថា លោកស្រីកំពុងនៅដាច់ដោយឡែកបន្ទាប់ពីចូលរួមក្នុងកិច្ចប្រជុំមួយ ដែលត្រូវបានចូលរួមដោយមនុស្សម្នាក់ដែលត្រូវបានគេធ្វើតេស្តវិជ្ជមានចំពោះជំងឺ COVID-១៩ ។

លោកស្រី Von der Leyen បាននិយាយថា លោកស្រីបានធ្វើតេស្តអវិជ្ជមានចំពោះជំងឺនេះកាលពីសប្តាហ៍មុនហើយនឹងត្រូវធ្វើតេស្តម្តងទៀតនៅថ្ងៃចន្ទនេះ។

លោកស្រីបានសរសេរថា "ខ្ញុំត្រូវបានគេជូនដំណឹងថាខ្ញុំបានចូលរួមក្នុងការប្រជុំមួយកាលពីថ្ងៃអង្គារមុនដោយមានការចូលរួមពីមនុស្សម្នាក់ដែលបានធ្វើតេស្តវិជ្ជមានសម្រាប់ជំងឺ COVID-១៩ ហើយដោយអនុលោមតាមបទប្បញ្ញត្តិជាធរមានខ្ញុំត្រូវនៅដាច់ដោយឡែករហូតដល់ព្រឹកស្អែក។ ខ្ញុំធ្លាប់បានធ្វើតេស្តអវិជ្ជមានកាលពីថ្ងៃព្រហស្បតិ៍ម្ដងរួចមកហើយ ខ្ញុំក៏បានធ្វើតេស្តម្តងទៀតនៅថ្ងៃនេះដែរ។"

ការប្រកាសរបស់លោកស្រី Von der Leyen កើតឡើងនៅពេលដែលករណីឆ្លងជំងឺ COVID-១៩ កំពុងកើនឡើងនៅអឺរ៉ុបដោយមានការរឹតត្បិតថ្មី និងការចាក់សោរនៅតាមមូលដ្ឋានដែលបានដាក់នៅក្នុងប្រទេសនានាទូទាំងទ្វីប។

នៅសាធារណរដ្ឋឆែកស្ថានភាពអាសន្នត្រូវបានដាក់ចេញអស់រយៈពេល ៣០ ថ្ងៃដើម្បីជួយទប់ស្កាត់ការចម្លងដ៏លឿននៃករណីជំងឺ COVID-១៩ ថ្មី និងដើម្បីបន្ថយសម្ពាធលើប្រព័ន្ធថែទាំសុខភាពក្នុងប្រទេស ព្រោះមានករណីថ្មីនៃជំងឺនេះចំនួន ១,៨៤១ ករណីទៀតហើយត្រូវបានកត់ត្រាដោយក្រសួងសុខាភិបាលកាលពីថ្ងៃអាទិត្យ។

នៅប្រទេសបារាំងឯណោះវិញ នាយករដ្ឋមន្រ្តីលោក Jean Castex បានបញ្ជាក់ថាតំបន់ Greater Paris នឹងត្រូវបានចាត់ថ្នាក់ជាតំបន់ “ប្រុងប្រយ័ត្នខ្ពស់បំផុត” ដោយមានវិធានការណ៍ចាប់ពីថ្ងៃអង្គារនេះតទៅបន្ទាប់ពីមានការកើនឡើងនូវចំនួនករណីឆ្លងជំងឺនេះ។ សេចក្តីប្រកាសព័ត៌មានពីការិយាល័យរបស់នាយករដ្ឋមន្រ្តីនិយាយថាតំបន់នេះបានឆ្លងផុតកម្រិត ៣ ដែលនឹងធ្វើឱ្យវាស្ថិតក្នុងចំណាត់ថ្នាក់ដ៏ប្រុងប្រយ័ត្នមួយ។

ទន្ទឹមនឹងនេះដែរចំនួននៃការឆ្លងជំងឺ COVID-១៩ នៅចក្រភពអង់គ្លេសក៏បានកើនឡើងកាលពីថ្ងៃអាទិត្យដល់កំណត់ត្រាថ្មីគឺ ២២,២៦១ ករណីគឺជិតទ្វេដងនៃកំណត់ត្រាមុនសម្រាប់មួយថ្ងៃ ខណៈដែលការឆ្លងរាប់ពាន់នាក់នេះមិនត្រូវបានរាប់បញ្ចូលក្នុងតួលេខប្រចាំថ្ងៃដែលបានផ្សព្វផ្សាយពីមុនទេ នេះបើយោងតាមក្រសួងសុខភាពសាធារណៈអង់គ្លេស។

ចំណែកប្រទេសប៉ូឡូញក៏បានរាយការណ៍អំពីករណីជំងឺ COVID-១៩ ថ្មីចំនួន ២,៣៦៧ នាក់កាលពីថ្ងៃសៅរ៍ដែលជាកំណត់ត្រាមួយខ្ពស់បំផុតសម្រាប់ថ្ងៃទី ៣ ជាប់ៗគ្នា នេះបើយោងតាមការផ្សាយជាបន្តដោយក្រសួងសុខាភិបាលរបស់ប្រទេសនេះ ខណៈដែលប្រទេសអ៊ីតាលីបានរាយការណ៍អំពីការកើនឡើងប្រចាំថ្ងៃខ្ពស់បំផុតរបស់ខ្លួនចាប់តាំងពីថ្ងៃទី ២៤ ខែមេសាដោយមានអ្នកផ្ទុកជំងឺថ្មីចំនួន ២,៨៤៤ ករណីនៅថ្ងៃសៅរ៍៕

ប្រភព៖ CNN