កូឡុំប៊ី៖ សហព័ន្ធបាល់ទាត់កូឡុំប៊ី (FCF) បាននិយាយកាលពីថ្ងៃអាទិត្យថា កីឡាករខ្សែប្រយុទ្ធ John Cordoba ត្រូវបានកោះហៅឱ្យទៅចូលរួមក្នុងក្រុមជម្រើសជាតិកូឡុំប៊ីសម្រាប់ការប្រកួតជម្រុះ World Cup ទល់នឹងក្រុមប្រទេសវេណេហ្ស៊ូអេឡា និងប្រទេសឈីលី។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកីឡាករវ័យ ២៣ ឆ្នាំរបស់ក្លិប Hertha Berlin រូបនេះនឹងត្រូវបានដាក់ឱ្យជំនួសកីឡាករខ្សែប្រយុទ្ធស្លាប Porto Luis Diaz ដែលត្រូវបានគេដាក់ឱ្យនៅដាច់ដោយឡែកបន្ទាប់ពីបានទាក់ទងជាមួយមនុស្សដែលបានឆ្លងជំងឺ COVID-១៩ នាពេលថ្មីៗនេះ។
សេចក្តីថ្លែងការណ៍របស់ FCF បាននិយាយថា “កីឡាករបាល់ទាត់របស់ក្លិប Porto ត្រូវបានរារាំងមិនឱ្យចូលរួមក្នុងក្រុមជម្រើសជាតិដោយសារតែពិធីសារ និងបទប្បញ្ញត្តិអនាម័យដែលបង្កើតឡើងដោយអាជ្ញាធរមូលដ្ឋាននៅព័រទុយហ្កាល់។
កីឡាករ Cordoba រកបាន ២ គ្រាប់ក្នុង ៣ ប្រកួតនៅក្របខ័ណ្ឌ Bundesliga នៅរដូវកាលនេះបន្ទាប់ពីការផ្លាស់ចេញរបស់គាត់ពីក្លិប FC Koln កាលពីខែកញ្ញាកន្លងទៅនេះ។
គួរបញ្ជាក់ឡើងវិញដែរថា ក្រុមកូឡុំប៊ីនឹងត្រូវជួបប្រកួតជាមួយក្រុមវេណេហ្ស៊ុយអេឡានៅ Barranquilla នាថ្ងៃសុក្រ និងក្រុមឈីលីនៅ Santiago នៅ ៤ ថ្ងៃក្រោយក្នុងការប្រកួតបើកឆាកនៃការប្រកួតជម្រុះ World Cup ឆ្នាំ ២០២២ របស់អាមេរិកខាងត្បូង៕
ប្រភព៖ ទីភ្នាក់ងារសារព័ត៌មានចិនស៊ីនហួរ