អាមេរិក៖ វីដេអូមួយដែលត្រូវបានបង្ហោះនៅលើបណ្ដាញសង្គម Twitter របស់ប្រធានាធិបតី ដូណាល់ ត្រាំ បានបង្ហាញវត្តមានរបស់លោកសាជាថ្មី ក្រោយពីបានធ្វើតេស្ដរកឃើញថា បានឆ្លងជំងឺកូវីដ-១៩។ នៅក្នុងវីដេអូ លោក ត្រាំ បានថ្លែងអំណរគុណទៅកាន់បុគ្គលិកសុខាភិបាល ដែលបានខ្នះខ្នែងជួយគាត់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកប្រធានាធិបតីបានបញ្ជាក់ថា គាត់បានមកដល់ទីនេះគឺមិនទាន់មានអារម្មណ៍ល្អនៅឡើយ តែឥឡូវបានធូរស្រាលជាងមុន។ លោកបានបន្ថែមទៀតថា គាត់នឹងវិលត្រឡប់មកវិញក្នុងពេលឆាប់ៗ និងបានលើកឡើងទៀតថា គាត់មានការប្ដេជ្ញាចិត្ត ក្នុងការប្រយុទ្ធប្រឆាំងនឹងវីរុសកូរ៉ូណាជាសកល។ មិនតែប៉ុណ្ណោះ លោក ត្រាំ បានថ្លែងថា រូបលោកពិតជាអរគុណខ្លាំងណាស់ ចំពោះអ្នកដែលបានជូនពរគាត់នៅក្នុងសហរដ្ឋអាមេរិក ក៏ដូចជាមេដឹកនាំពិភពលោកទាំងឡាយ ដែលបានបង្ហាញពីក្ដីព្រួយបារម្ភផងដែរ។
គាត់ក៏បាននិយាយផងដែរថា ស្ត្រីទីមួយមិនមានបញ្ហាធ្ងន់ធ្ងរនោះទេ ដោយបង្ហាញប្រាប់ថា ភរិយារបស់គាត់នៅក្មេងជាងគាត់ ហើយដូច្នេះវាស្ថិតនៅក្នុងហានិភ័យទាប ជាងលោកប្រធានាធិបតីដែលមានអាយុ៧៤ឆ្នាំ។ លោក ត្រាំ នឹងរង់ចាំមើលលទ្ធផលនៃការធ្វើតេស្ដបន្ថែម នៅប៉ុន្មានថ្ងៃខាងមុខទៀត ដោយសង្ឃឹមថា នឹងទទួលបានលទ្ធផលល្អ៕