សងសឹកបានសម្រេច! Arsenal ទម្លាក់ Liverpool ចេញពីពានរង្វាន់ League Cup ក្នុងវគ្គប៉េណាល់ទី (មានវីដេអូ)

អង់គ្លេស៖​ ក្រោយចាញ់ Liverpool ក្នុងការប្រកួតក្របខ័ណ្ឌ Premier League ប៉ុន្មានថ្ងៃមុន ក្លិបកាំភ្លើងធំ Arsenal ត្រឡប់មកធ្វើការសងសឹកវិញបានសម្រេច ដោយទម្លាក់ក្លិបលោក Jurgen Klopp មួយនេះចេញពីពានរង្វាន់ League Cup ក្នុងវគ្គប៉េណាល់ទីយប់មិញនេះ។ 

នៅក្នុងការប្រកួតនោះដែរ Liverpool មានឱកាសស៊ុតដល់ទៅ១៦ជើងឯណោះ​ នឹងចំគោលដៅ៧លើក ប៉ុន្តែមិនអាចទម្លុះដៃអ្នកចាំទី Bernd Leno របស់ Arsenal បាននោះទេ។ ហើយលទ្ធផល០ទល់នឹង០នេះ បានរក្សារហូតដល់ចប់ការប្រកួត៩០នាទី។ 

ចូលដល់វគ្គប៉េណាល់ទី Arsenal ធ្វើបានល្អជាងពោលស៊ុត៦គ្រាប់ ខូចតែមួយគ្រាប់ប៉ុណ្ណោះ រីឯ Liverpool ស៊ុត៦គ្រាប់ដូចគ្នា ខូចដល់ទៅ២គ្រាប់។ យោងតាមលទ្ធផលនេះក្លិបលោក Arteta បានកក់កៅអីឡើងទៅលេងវគ្គ៨ក្រុមចុងក្រោយបន្ត ចំណែក Liverpool ត្រូវធ្លាក់ចេញត្រឹមវគ្គ១៦ក្រុមនេះ៕

ប្រភព៖ bbc