កៀវ៖ ទីភ្នាក់ងារសេវាកម្មបន្ទាន់របស់អ៊ុយក្រែនបានរាយការណ៍នៅថ្ងៃព្រហស្បតិ៍ថា មនុស្សយ៉ាងហោចណាស់ ៤នាក់បានស្លាប់បាត់បង់ជីវិត និង ១០នាក់ផ្សេងទៀត ត្រូវបានបញ្ជូនទៅកាន់មន្ទីរពេទ្យ ដោយសារហេតុការណ៍ភ្លើងឆេះព្រៃ ដែលកំពុងឆេះរាលដាលនៅតំបន់ Luhansk ភាគខាងកើតប្រទេសអ៊ុយក្រែន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសេចក្តីថ្លែងការណ៍របស់ទីភ្នាក់ងារខាងលើបានឱ្យដឹងទៀតថា ភ្លើងឆេះព្រៃនេះបានគំរាមកំហែងដល់លំនៅដ្ឋានពលរដ្ឋចំនួន ២២កន្លែង និងឆេះព័ទ្ធជុំវិញផ្ទៃដីប្រហែល ១៨,០០០ហិកតា ហើយមកដល់ពេលនេះ មានពលរដ្ឋប្រមាណ ១២០នាក់ ត្រូវបានជម្លៀសទៅរកទីសុវត្ថិភាព។
យោងតាមអាជ្ញាធរមូលដ្ឋានក៏បានឱ្យដឹងដែរថា ហេតុការណ៍ភ្លើងឆេះព្រៃ បានកើតមានឡើងចំនួន ១៤៦កន្លែង ដោយក្នុងនោះ ៨២កន្លែង ត្រូវបានពន្លត់ទាន់ពេលវេលា។ ភ្លើងឆេះព្រៃភាគច្រើនគឺកើតឡើង នៅក្បែរតំបន់ដែលគ្រប់គ្រងដោយក្រុមបំបែកខ្លួននិយមរុស្ស៊ី ហើយទន្ទឹមនឹងនេះ អាជ្ញាធរអ៊ុយក្រែនកំពុងសង្ស័យថា អគ្គិភ័យនេះអាចបណ្តាលមកពីការបាញ់ផ្លោងសំណាក់ក្រុមបំបែកខ្លួន។
គួរជម្រាបដែរថា បច្ចុប្បន្នការិយាល័យប្រធានាធិបតីអ៊ុយក្រែន បានអំពាវនាវឱ្យស្ថាប័នអនុវត្តច្បាប់រកមូលហេតុនៃអគ្គិភ័យនេះ ថាតើវាបង្កឡើងដោយក្រុមឧទ្ទាមនិយមរុស្ស៊ី ឬបណ្តាលមកពីលក្ខខណ្ឌអាកាសធាតុឱ្យពិតប្រាកដ៕