ញាក់សាច់! អ្នកវិទ្យាសាស្ដ្រម្នាក់ បើកដៃឲ្យមូសជញ្ជក់ឈាមតាមចិត្ដ សម្រាប់ការស្រាវជ្រាវ (មានវីដេអូ)

អូស្ដ្រាលី៖ អ្នកវិទ្យាសាស្ដ្រម្នាក់​ មកពីសកលវិទ្យាល័យ Melbourne បានអនុញ្ញាតឲ្យមូសរាប់ពាន់ក្បាលខាំដៃរបស់គាត់ជាចំណីប្រចាំថ្ងៃ ដើម្បីរក្សាទុក សម្រាប់ស្រាវជ្រាវលើការលុបបំបាត់ជំងឺគ្រុនឈាម។

លោកវេជ្ជបណ្ឌិត Perran Stott-Ross បានចូលរួមក្នុងការស្រាវជ្រាវមូស នៅសកលវិទ្យាល័យ Melbourne អស់រយៈពេលជាច្រើនឆ្នាំមកហើយ ក្នុងការព្យាយាមរកវិធីដែលមានប្រសិទ្ធភាព ដើម្បីទប់ស្កាត់ការរីករាលដាលនៃជំងឺគ្រុនឈាម ដែលឆ្លងពីមូសញីមកមនុស្ស។

យុទ្ធសាស្ដ្រមួយក្នុងចំណោមយុទ្ធសាស្ដ្រដែលមានប្រសិទ្ធភាព គឺការចាក់បញ្ជូល Wolbachia ដែលជាបាក់តេរីរារាំងការឆ្លងជំងឺគ្រុនឈាមពីធម្មជាតិចូលទៅក្នុងពងមូសញី ហើយវានឹងចម្លងបាក់តេរីនោះទៅសត្វមូសច្រើនជំនាន់ទៀត។

គួរឲ្យដឹងថា អ្នកវិទ្យាសាស្ដ្រអូស្ដ្រាលីរូបនេះ ទទួលបានការចាប់អារម្មណ៍លើកដំបូងកាលពីខែមីនា នៅពេលដែលគាត់បានបង្ហោះរូបថតនៃដៃរបស់គាត់ ដែលពោលពេញទៅដោយស្នាមកន្ទួល បន្ទាប់ពីត្រូវបានមូសញីប្រមាណ ៥,០០០ក្បាលជញ្ជក់ឈាមក្នុងមួយថ្ងៃ ដោយបាត់បង់ឈាមអស់ ១៦មីលីលីត្រ។ ទន្ទឹមនឹងនេះ លោកសារភាពថា ពេលខ្លះមូសខាំអាចធ្វើឲ្យរមាស់ ប៉ុន្ដែលោកចៀសវាងមិនអេះនោះទេ។

សូមទស្សនារូបភាពនិងវីដេអូខាងក្រោម៖