​តួកគីបាញ់ទម្លាក់យន្តហោះចម្បាំងរបស់ប្រទេសអាមេនី

យេរេវ៉ាន៖ ប្រទេសអាមេនី​អះអាងថា យន្តហោះចម្បាំងរបស់ខ្លួនមួយគ្រឿង ត្រូវបានបាញ់ទម្លាក់ដោយយន្ដហោះតួកគី ​កំឡុងពេលប្រយុទ្ធគ្នាជាមួយកងកម្លាំងអាស៊ែបៃសង់ នៅតំបន់មានជម្លោះ​ ​ណាហ្គោណូ ការ៉ាបាក់ (Nagorno-Karabakh) ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្រសួងការបរទេសអាមេនីបាននិយាយថា យន្តហោះចម្បាំង F-16 របស់តួកគី​ បានហោះចូលដែនអាកាសប្រទេសអាមេនី ហើយបាញ់ទម្លាក់ហោះ SU-25 ដែលទិញពីសូវៀត បណ្តាលឱ្យពីឡុតម្នាក់ត្រូវស្លាប់បាត់បង់ជីវិត។ ប៉ុន្តែបើទោះបីជាយ៉ាងណាក្តី តួកគីដែលជាសម្ព័ន្ធមិត្តជិតស្និទ្ធ និងជាអ្នកគាំទ្រអាស៊ែបៃសង់លើជម្លោះនេះ បានចេញមុខបដិសេធដោយលើកឡើងថា វាគឺជារឿងមិនពិត​។

ណាហ្គោណូ ការ៉ាបាក់ គឺជាតំបន់មួយដែលត្រូវបាន​ទទួលស្គាល់ជាអន្តរជាតិ​ ថាជាផ្នែកមួយនៃប្រទេសអាស៊ែបៃសង់។ ប៉ុន្តែ​​នៅកំឡុង​សម័យសង្គ្រាម​​ពេលដែលសហភាពសូវៀតបានដួលរលំនៅឆ្នាំ ១៩៩១ តំបន់នេះបានប្រកាសផ្តាច់ខ្លួនចេញអាស៊ែបៃសង់ ហើយបច្ចុប្បន្នស្ថិតនៅក្រោមការគ្រប់គ្រងរបស់​ពលរដ្ឋអាមេនី។

គួរជម្រាបដែរថា ​ជម្លោះប្រដាប់អាវុធរវាងអាស៊ែបៃសង់និងអាមេនី​នៅតំបន់ការ៉ាបាក់ ដែលចាប់ផ្តើមឡើងកាលពីថ្ងៃអាទិត្យសប្តាហ៍មុននេះ បានបណ្តាលឱ្យមនុស្ស​ជិត ១០០នាក់ ត្រូវស្លាប់បាត់បង់ជីវិត។ ហើយខណៈដែលតួកគីបានបង្ហាញការគាំទ្រ​អាស៊ែបៃសង់ដោយបើកចំហ រុស្ស៊ីដែលមានមូលដ្ឋានទ័ពនៅប្រទេសអាមេនី តែក៏មាន​ទំនាក់ទំនងជិតស្និទ្ធជាមួយ​​អាស៊ែបៃសង់ផងនោះ ក៏បានអំពាវនាវឱ្យមានបទឈប់បាញ់ជាបន្ទាន់៕