ចិនធ្វើសមយុទ្ធយោធា លើផ្ទៃសមុទ្រចំនួន​៤ ក្នុងពេលតែមួយ

ប៉េកាំង៖ ​កងកម្លាំងយោធាចិនបានចាប់ផ្តើមធ្វើសមយុទ្ធយោធាចំនួនប្រាំ ​នៅលើផ្ទៃសមុទ្រចំនួន​បួនក្នុងពេលដំណាលគ្នា​ ​​ខណៈពេលដែលភាពតានតឹងនៅក្នុងតំបន់​កំពុងតែឡើងកំដៅ។ យោងតាម​រដ្ឋបាលសុវត្ថិភាពដែនសមុទ្រ​ចិនបានឱ្យដឹងថា សមយុទ្ធយោធាចិនចំនួន​ពីរ ​បាននឹងកំពុងធ្វើឡើង​ក្បែរប្រជុំកោះប៉ារ៉ាសែលក្នុងតំបន់ជម្លោះសមុទ្រចិនខាងត្បូង សមយុទ្ធ​មួយធ្វើនៅសមុទ្រចិនខាងកើត ​សមយុទ្ធមួយធ្វើនៅភាគខាងជើង​សមុទ្របូហៃ និងមួយទៀតធ្វើនៅ​ប៉ែកខាងត្បូងសមុទ្រលឿង។

នៅក្នុងគោលបំណងជម្រុញដល់ការបណ្តុះបណ្តាលដល់កងកម្លាំងយោធាខ្លួន​ ប្រទេសចិន​បានរៀបចំធ្វើសមយុទ្ធជាបន្តបន្ទាប់ ប៉ុន្តែកម្រនឹងធ្វើ​សមយុទ្ធជាច្រើនក្នុងពេលតែមួយដូចនេះណាស់។ កាលពីខែមុន ប្រទេសចិនបានប្រកាស​សមយុទ្ធដាច់ដោយឡែកចំនួនបួន ​នៅសមុទ្របូហៃ សមុទ្រខាងកើត សមុទ្រលឿង និងបន្តរហូតដល់សមុទ្រចិនខាងត្បូង​ ខណៈដែលអ្នកជំនាញយោធាចិន​បានលើកឡើងថា វាជាការរៀបចំសមយុទ្ធដ៏កម្រ​។ ហើយដើម្បីជាការឆ្លើយតប សហរដ្ឋអាមេរិកបានបញ្ជូនយន្តហោះស៊ើបការណ៍ ហោះចូលក្នុងតំបន់ហាមឃាត់ចិន ហើយត្រូវប្រទេសចិន​ស្តីបន្ទោស ចំពោះសកម្មភាពបង្ក​ការតានតឹងរបស់សហរដ្ឋអាមេរិក។

គួរជម្រាបដែរថា ​ភាពតានតឹង​រវាងអាមេរិកនិងចិនបានឡើងកំដៅ ក្នុងរយៈពេលប៉ុន្មានខែចុងក្រោយនេះ ​ដោយសារបញ្ហាមួយចំនួនរាប់ចាប់ពី​ ការឆ្លងរាលដាលនៃជំងឺកូវីដ១៩ ​ការធ្វើពាណិជ្ជកម្ម​របស់ទីក្រុងប៉េកាំង ក៏ដូចជាបញ្ហាទាក់ទងនឹង​កោះតៃវ៉ាន់ជាដើម​៕