អ្នកឆ្លងជំងឺកូវីដ១៩នៅឥណ្ឌា កើនឡើងដល់ជាង៦លាននាក់

ញូដេលី៖ យោងតាមទិន្នន័យពីក្រសួងសុខាភិបាលឥណ្ឌាបានបង្ហាញ​នៅថ្ងៃច័ន្ទនេះថា អ្នកឆ្លងជំងឺកូវីដ១៩នៅឥណ្ឌាបានកើនឡើងដល់ជាង ៦លាននាក់ បន្ទាប់ពី​​រកឃើញអ្នកឆ្លងថ្មីចំនួន ៨២,១៧០នាក់បន្ថែមទៀត ក្នុងរយៈពេល ២៤ ម៉ោងចុងក្រោយ។

ក្រសួងសុខាភិបាលបានឱ្យដឹងទៀតថា នៅថ្ងៃដដែលមានមនុស្សស្លាប់ចំនួន ១,០៣៩នាក់ ដែលធ្វើឱ្យ​ចំនួនអ្នកស្លាប់សរុបឡើងដល់ ៩៥,៥៤២នាក់ ខណៈអ្នកជាសះស្បើយសរុប​ឡើងដល់ជាង ៥លាននាក់។  

គួរជម្រាបដែរថា នៅទូទាំងពិភពលោក ប្រទេសឥណ្ឌាមានចំនួនអ្នកឆ្លងកូវីដ១៩ខ្ពស់ជាងគេលំដាប់ទី២ តាមពីក្រោយសហរដ្ឋអាមេរិក ដែលមាន​អ្នកឆ្លងជំងឺ​ជាង ៧លាននាក់​ ​អមដោយចំនួនអ្នកស្លាប់ជាង ២០ម៉ឺននាក់៕