អបអរសាទរ! ភរិយារបស់ ច្រឹង ពលរដ្ឋ សម្រាលបានកូនប្រុសម្នាក់មុននេះបន្តិច

ភ្នំពេញ៖ ប្រិយមិត្តអ្នកស្នេហាវិស័យកីឡាបាលទាត់ក្នុងស្រុកភាគច្រើន ប្រាកដជាបានស្គាល់រួចមកហើយ នូវកីឡាករ ច្រឹង ពលរដ្ឋ ដែលជាខ្សែបម្រើរូបសង្ហារបស់ក្លិប វិសាខា ។ យ៉ាងណាមិញ កាលពីប៉ុន្មានម៉ោងមុននេះ ខ្សែបម្រើវ័យ២៣ឆ្នាំ បានបង្ហោះនូវរូបភាពមួយចំនួន បង្ហាញពីការទន្ទឹមរង់ចាំ សមាជិកថ្មីរបស់គេ បន្ទាប់ពីភរិយារបស់គេ ពរពោះអស់ជាច្រើនខែ។

ហើយបើតាមការបង្ហោះរបស់ ពលរដ្ឋ នៅលើបណ្ដាញសង្គម ខ្ទង់ម៉ោង១០កន្លះ ព្រឹកថ្ងៃច័ន្ទនេះ បានឲ្យដឹងថា ភរិយារបស់គេ សម្រាលបានកូនប្រុសម្នាក់ដ៏ជោគជ័យ។ ទន្ទឹមនឹងដំណឹងដ៏ត្រកអរនេះ ពលរដ្ឋ ក៏បានបង្ហោះរូបកូនប្រុសដ៏គួរឲ្យស្រលាញ់របស់ខ្លួន អមជាមួយពាក្យថា “ Thank You Everyone” ដែលចង់សម្ដែងការអគុណទៅដល់អ្នកគាំទ្រដែលបានផ្ញើរសារជូនពររូបគេកន្លងមក ក៏ដូចជាពាក្យអបអរសាទរជាហូរហែរ។

បន្ថែមពីនេះ ក្រោយធ្វើការឆ្លើយឆ្លងគ្នាជាមួយក្រុមការងារខ្មែរឡូត តាមរយៈសារអេឡិចត្រូនិច ប្រភពជិតស្និទ្ធរបស់ពលរដ្ឋ បានប្រាប់ឲ្យដឹងថា កូនប្រុសដ៏ស្រស់ស្អាត របស់ជម្រើសជាតិកម្ពុជារូបនេះ មានឈ្មោះថា "ពលរដ្ធ រិទ្ធ សាការិន" ៕