ល្អដូចផ្កា! Barca លត់ Villarreal ៤-០ ប្រកួតបើកឆាក La Liga ខណៈខ្សែប្រយុទ្ធវ័យក្មេង Fati រកបាន២គ្រាប់ម្នាក់ឯង (មានវីដេអូ)

អេស្ប៉ាញ៖ ក្រុមអ្នកមានបុណ្យ Barcelona ហាក់ចាប់ផ្ដើមបានល្អ សម្រាប់រដូវកាលថ្មីនេះ ជាក់ស្ដែងប្រកួតដំបូងរបស់ពួកគេ ក្នុងក្របខ័ណ្ឌ​ La Liga រដូវកាល ២០២០/២១ កាលពីរាត្រីថ្ងៃអាទិត្យម្សិលមិញ លោក Ronald Koeman បានដឹកនាំ Barca យកឈ្នះក្រុម Villarreal ក្នុងលទ្ធផលយ៉ាងគាប់ប្រសើ ៤ទល់នឹង០។

ក្នុងការប្រកួតដែលប្រព្រឹត្តទៅកីឡដ្ឋាន Camp Nou នេះដែរ គិតត្រឹមតង់ទី១ គឺមានគ្រាប់បាល់កើតឡើងចំនួន៤គ្រាប់តែម្ដង ពោលខ្សែប្រយុទ្ធវ័យក្មេងដែលជាម្ចាស់អាវលេខ២២ថ្មី​ កីឡាករ Ansu Fati ស៊ុតបាន២គ្រាប់បើកឆាក នៅនាទីទី១៥ និង ១៩។ រីឯគ្រាប់ទី៣ ជាការស៊ុតបាល់ពិន័យ១១ម៉ែត្ររបស់ខ្សែប្រយុទ្ធជម្រើសជាតិអាហ្សង់ទីន Lionel Messi ក្រោយខ្សែការពារក្រុមភ្ញៀវ កីឡាករ Mario Gaspar រុញ Fati ឲ្យដួលក្នុងប្រអប់គ្រោះថ្នាក់នៅនាទីទី៣៥ ។ ខណៈគ្រាប់ទី៤ ដែលជាគ្រាប់ចុងក្រោយ ជាការភ្លាត់ធ្វើឲ្យចូលទីខ្លួនឯងរបស់ខ្សែការពារកណ្ដាលក្រុម Villarreal កីឡាករ Pau Torres នៅនាទីទី៤៥។

គួរឲ្យដឹងដែរថា ក្របខ័ណ្ឌ​ La Liga បានឈានមកដល់សប្ដាហ៍ទី៣ហើយ ខណៈក្រុមដែលកំពុងឈរកំពូលតារាងបណ្ដោះអាសន្នគឺក្រុម Real Batis មាន៦ពិន្ទុក្នុងដៃ ខណៈក្រុម Barca ក្រោយឈ្នះប្រកួតម្សិលមិញ ទទួលបាន៣ពិន្ទុ ឈរលេខ១០៕

សូមទស្សនាវីដេអូសង្ខេបនៃការប្រកួតខាងក្រោមនេះ៖