អ្នកជំនាញថា ចំនួនអ្នកស្លាប់ពិតប្រាកដដោយសារជំងឺកូវីដ-១ ក្នុងប្រទេសឥណ្ឌូណេស៊ី អាចច្រើនជាងតួលេខផ្លូវការដល់ទៅ៣ដង

ឥណ្ឌូណេស៊ី៖ ចំនួនអ្នកស្លាប់ពិតប្រាកដដោយសារជំងឺកូវីដ-១៩ នៅក្នុងប្រទេសឥណ្ឌូណេស៊ី អាចមានចំនួនច្រើនជាងបីដង នៃតួលេខផ្លូវការដែលបានកើនឡើងដល់ ១០,២១៨នាក់ កាលពីថ្ងៃសុក្រ ទី២៥ ខែកញ្ញា ឆ្នាំ២០២០។

លោក Dicky Budiman ជាអ្នកជំនាញផ្នែកសុខភាពនៃសកលវិទ្យាល័យអូស្ដ្រាលី Griffith បាននិយាយថាប្រទេសឥណ្ឌូណេស៊ី គឺជាប្រទេសដែលមានចំនួនអ្នកស្លាប់ដោយសារជំងឺកូវីដ-១៩ ច្រើនជាងគេបំផុតនៅតំបន់អាស៊ាន និងជាប់ចំណាត់ថ្នាក់ទីបីក្នុងតំបន់អាស៊ី។

លោកបន្ដថា ចំនួនអ្នកស្លាប់ក្នុងប្រទេសឥណ្ឌូណេស៊ីជាងមួយម៉ឺននាក់ គឺជាតួលេខផ្លូវការដែលបានបញ្ជាក់ ប៉ុន្ដែយើងមិនរាប់បញ្ជូលចំនួននៃអ្នកស្លាប់ដែលមានករណីប្រហែល ឬសង្ស័យនោះទេ។ ប្រសិនបើ យើងរាប់ពួកគេបញ្ជូលដែរនោះ យើងនឹងបានឃើញចំនួនច្រើនជាងបីដង នៃចំនួនសរុបបច្ចុប្បន្ន។

គួរបញ្ជាក់ថា យោងតាមគេហទំព័រ Worldometers គិតត្រឹមម៉ោង១:០០នាទីរសៀលថ្ងៃអាទិត្យ ទី២៧ ខែកញ្ញា ឆ្នាំ២០២០ ចំនួនអ្នកស្លាប់ដោយសារកូវីដ-១៩ក្នុងប្រទេសឥណ្ឌូណេស៊ីបានកើនដល់ ១០,៣០៨នាក់ ក្នុងចំណោមអ្នកឆ្លងសរុបចំនួន ២៧១,៣៣៩នាក់ ខណៈអ្នកជំងឺចំនួន ១៩៩,៤០៣នាក់ជាសះស្បើយវិញ៕

សូមទស្សនារូបភាពខាងក្រោម៖