ចិនផ្អាកការនាំចូលគ្រឿងសមុទ្រពីនាវារុស្ស៊ី ក្រោយរកឃើញមេរោគបង្កជាជំងឺកូវីដ១៩

សៀងហៃ៖ ប្រទេសចិនបានប្រកាសថា នឹងផ្អាក​ការនាំចូលគ្រឿងសមុទ្រពីនាវារុស្ស៊ីចំនួនពីរគ្រឿង​រយៈពេល ៤សប្តាហ៍ ​ក្រោយរកឃើញមេរោគបង្កជំងឺកូវីដ១៩នៅលើកញ្ចប់គ្រឿងសមុទ្រ។ ការិយាល័យគយបានឱ្យដឹងនៅថ្ងៃសៅរ៍នេះថា មេរោគកូវីដ១៩នេះត្រូវបានរកឃើញដោយអាជ្ញាធរនៅខេត្តជាប់ឆ្នេរសមុទ្រសានដុង។

​នាវា​រុស្ស៊ីដែលត្រូវអាជ្ញាធរចិនប្រកាសផ្អាកមិនឱ្យនាំចូល គឺមានឈ្មោះថា VLADIMIR STARZHINSKY LLC និង ROLIZ CRYSTAL AFRICA ។ ​កាលពីថ្ងៃសុក្រកន្លងទៅ ការិយាល័យគយចិន​បាននិយាយថា ខ្លួននឹងផ្អាកការនាំចូលគ្រឿងសមុទ្រពីក្រុមហ៊ុនប្រេស៊ីលមួយសប្តាហ៍ដែរ បន្ទាប់​ពីរកឃើញមេរោគកូវីដ១៩។

គួរឱ្យដឹងដែរថា វិធានការផ្អាកការនាំចូលគ្រឿងសមុទ្រពីប្រទេសជិតខាងនេះ ត្រូវបានធ្វើឡើងខណៈអាជ្ញាធរចិនកំពុងមានការព្រួយបារម្មណ៍លើបញ្ហាឆ្លងរាលដាលនៃជំងឺកូវីដ១៩។ ហើយកាលពីសប្តាហ៍មុន ប្រទេសចិនក៏បានផ្អាកការនាំចូល​គ្រឿងសមុទ្រពីឥណ្ឌូនេស៊ីអស់រយៈពេលមួយសប្តាហ៍មកហើយ បន្ទាប់ពី​ធ្វើតេស្តរកឃើញថាមានផ្ទុក​មេរោគកូវីដ១៩ដូចគ្នានេះ៕